In su coro de su Sarcidanu, intre sas provìntzias de Aristanis e Nùgoro, s’agatat unu paradisu pro sos amantiosos de sa naturalesa e de s’escursionismu: su Parcu Aymerich de Làconi. Cun sos 22 ètaros suos, est su parcu urbanu prus mannu de sa Sardigna e, a chie lu bisitat, donat sa possibilidade de tènnere un’esperièntzia ùnica intre botànica, istòria e archeologia.
Su parcu, in su foraidda de Làconi, comunu a 60 chilòmetros dae Aristanis e 90 dae Casteddu, est un’òasi birde chi finas a su 1990 aparteniat a una famìlia nòbile de marchesos. S’imbentore de custu giardinu botànicu fiat istadu don Ignazio Aymerich Ripoll, un’amantiosu de botànica chi, dae sa metade de su sèculu XIX, aiat introduidu in su parcu matas raras regortas in sos biàgios suos foras de s’ìsula.
S’escursione in su parcu Aymerich est unu biàgiu ispantosu chi cumintzat in su coro de Làconi, tzentru ricu de istòria. Partende dae sa chi a unu tempus fiat sa carrera printzipale de sa bidda, si lompet a su parcu, oe gestidu dae Forestas. Sa giardinu faghet a lu bisitare sena de ghia, opuru cun sa ghia de s’assòtziu De Lacon, mutende a su nùmeru 340 3995145 (Federico). Una cantas àndalas sighint su terrinu gradonadu de su parcu colende in mesu a unu padente de èlighes, chercos, olias e silimbas, inghiriados dae grutas naturales abitadas dae su neolìticu, laghigeddos, trainos e istrumpos de abba cristallina. Fatu fatu de su percursu, in beranu, si podet ammirare una variedade ispantosa de orchideas, comente sas autòctonas Ophris laconensis e Sarcidanis, e matas comente s’èlighe, su lione, s’opinu de sa Còrsica, ma finas fundos esòticos comente sos maestosos chidros de su Lìbanu e de s’Himàlaja.
S’abba, elementu vitale de su parcu, curret bundante a tot’annu, finas in custu perìodu de sicore.
Ma su Parcu Aymerich no est naturalesa ebbia, difatis in intro s’agatant fintzas sas ruinas de unu casteddu medievale chi faghet craru in totu sa costera. Fraigadu in su sèculu XIII, su casteddu fiat una fortilesa istratègica in sas gherras intre sos giuigados de Arbaree e de Casteddu e posca, cun s’arribbu de sos aragonesos, residèntzia de sa famìlia Aymerich. In s’Otighentos, a pustis de un’intzèntziu chi l’aiat isciusciadu belle totu, sos Aymerich s’aiant impreadu pro ornamentu de su giardinu romànticu, comente fiat sa moda de tando.
Sende ca su casteddu non si podiat impreare prus, sos Aymerich s’aiant fraigadu una residèntzia noa, unu palatzu nobiliare chi oe est sa sede de su Museu de s’Istatuària Preistòrica in Sardigna, chi acasàgiat sa colletzione prus manna de menhir de s’ìsula e repertos de sas necròpolis prenuràgicas de su Sarcidanu. Semper in su matessi palatzu su podet bisitare sa mustra de sos paperis pintados frantzesos (carte da parati) chi imbellint sos aposentos de su pianu nòbile de s’edifìtziu chi aiat acasagiadu reales, nòbiles, biagiadores e personalidades de cabbale de agabbu Otighentos.
In fines, pro completare su biàgiu, si podet bisitare sa domo nadale de Sant’Ignàtziu, patronu de sa bidda e su museu a issu dedicadu, e sa domo de su notariu Luigi Sulis, una villa in istile Liberty bene cunservada.
Dae ocannu, in prus, est disponibile un’aplicatzione dedicada a su Parcu Aymerich, pro ghiare sos bisitadores a s’iscoberta totu sos giassos de interessu presentes in su purmone birde prus mannu de sa Sardigna. S’aplicatzione est disponìbile in sas butegas eletrònicas Android e iOS e est atzessìbile fintzas pro sos bisitadores chi non bident.
S’aplicatzione est dotada de una mapa interativa chi permitit sa visualizatzione de totu sas atratziones e ghiat sas pessones finas a su puntu chi cherent bisitare, colende s’àndala mègius. Sos logos de interessu sunt agrupados in un’elencu cun sas descritziones, cumpresas fintzas de audioghias.
A presu de cada atratzione, su bisitadore retzit una notìfica cun sas informatziones dedicadas, gràtzias a sos aparatos installados dae sa GreenShare chi podent comunicare intro unu raju cùrtziu cun sos telefoneddos intelligentes.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
