Sas chidas coladas su grupu consiliare de Fratelli d’Italia at presentadu un’interrogatzione contra a unu progetu de ditzionàriu in Limba sarda comuna, narende chi in antis tocat de aplicare s’artìculu 8 de sa lege regionale 22 de su 2018 («Sa Consulta elàborat una proposta de istandard linguìsticu e de norma ortogràfica de sa limba sarda e nde contivìgiat s’agiornamentu»).
Unu paradossu polìticu singulare, sende chi sos melonianos voteint contra a custa lege. Ma pongiamus·nche pro un’iscuta a banda sas cuntierras locales de fatzada in contu de sèberos linguìsticos; prus a prestu fatzamus unu brincu a Roma, ue Fratelli d’Italia est a su presente su partidu printzipale de sa majoria de guvernu. Ca est in cue chi disinnant sos destinos de sa lege istatale 482 de su 1999 pro sas minorias linguìsticas.
Diamus una mirada a sos nùmeros pro nos cumprèndere mègius, ca sos fundos istatales destinados a sa Sardigna sunt connoschende una grandu mèngua. A pustis de su chi ant postu a cùrrere su 2022 cun belle 1,5 miliones de èuros (decretu de su 4 de santugaine, galu cun s’esecutivu Draghi), su dipartimentu pro sos Afàrios regionales de su guvernu Meloni at comintzadu a nde bogare dinare: pagu prus de unu millione su 2023, 725mìgia èuros su 2024 e galu falende a 692 su 2025. In tres annos sos finantziamentos dae Roma sunt minimados de prus de sa metade.
Si s’Istadu bi la sighiret de custa manera, su resurtu diat èssere unu ebbia: at a tocare a sa Regione a prenare sos bòidos lassados dae su Guvernu tzentrale. E b’ant a pèrdere sos isportellos linguìsticos in sos Comunes, sos progetos iscolàsticos, sas atividades culturales e sos servìtzios a sos tzitadinos si s’ente regionale non b’at a resèssere.
Ite narant sos de Fratelli d’Itàlia? In Casteddu àrtziant sa boghe contra a unu ditzionàriu in sardu e in Roma si callant a sa muda sena cuntrastare sas mènguas de sos fundos de sa 482?
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
