Su Tzentru de educatzione ambientale e a sa sustenibilidade de su Monte Arvu, in collaboratzione cun su Comune de Lodè, ponet in programma pro domìniga su 13 de custu mese (dae sas 9 de mangianu in sa fratzione de Sant’Anna de sa matessi bidda baroniesa) s’eventu “Il Suolo: Una Risorsa da Proteggere”.
Custa manifestatzione est s’èsitu de unu progetu chi movet dae sa netzessidade de su contivìgiu de su terrinu e chi punnat a sensibilizare sos presentes a sa chistione de su consumu antròpicu, a sas cajones de custu fenòmenu e a sos remèdios chi si podent aplicare intre sos possìbiles a disponimentu nostru.
S’eventu mentovadu nch’est in intro de sa programmatzione regionale “Ceas Aperti” chi est interessende 45 tzentros de educatzione ambientale de Sardigna dae su 24 de cabudanni coladu finas a su 15 de santugaine.
Su contivìgiu de su terrinu, comente si cumprendet, est su criu de s’eventu sende chi su chi b’amus in suta de pees est una resursa de grandu importu pro su praneta nostru.
Ca est dae su terrinu chi b’amus su sustentu pro mèdiu de matèrias primas e produtos alimentares; ca est issu chi traballat comente reguladore de su clima e de sa calidade de s’abba; ca est semper issu chi assèliat a sos fenòmenos idrològicos estremos; ca est su mègius amparu de sa biodiversidade.
Sa manifestatzione, chi durat finas a sas 4 de borta de die e chi, a s’indonu, est indiritzada a famìlias, mannos e minores, previdet acrarimentos de su fenòmenu (faghende connòschere a sos partetzipantes su chi determinat sa pèrdida de superfìtzies naturales e agrìculas, sas cunsighèntzias pro sa biodiversidade, su degradu de su terrinu e sa mèngua de servìtzios ecosistèmicos), atividades pràticas de campu comente sa sèmena de foràgios sardos e unu laboratòriu vivaìsticu.
S’eventu est a nùmeru limitadu, duncas bi cheret sa prenotazione iscriende una mail a ceasmontalbolode@gmail.com o telefonende a su nùmeru 340 152 95666.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
