Sa data est ufitziale. Pro su referendum in contu de giustìtzia amus a votare domìniga su 22 e lunis su 23 de martzu. No est una nova noa-noa, sende chi custa possibilidade l’aiat antitzipada sas dies coladas su presidente de su Cussìgiu Giorgia Meloni. Sa cunfirma nd’est essida a campu dae sa prima setziada guvernativa de ocannu in pare cun sos ministros suos. Como a su referendum li mancat petzi s’ùrtimu passàgiu formale: su decretu presidentziale de su Quirinale, cun sa firma de Sergio Mattarella in sa Gazeta ufitziale.
E sa data, in prus de sa chistione intrìnseca de sa cramada referendària, fiat issa etotu ogetu de chertu intre sa majoria chi sustenet su guvernu e sas opositziones. Sa prima fiat semper de s’idea de abèrrere sos sègios a comintzu de martzu; sos partidos de minoria cheriant a aeremus votadu in abrile. Duncas diat pàrrere unu sèberu a mesu tretu intre sas duas optziones.
Pro seguru, imbetzes, at a èssere una gherra sena presoneris totu sa campagna referendària. Cada votu est un’ocasione pro s’èsitu chèrfidu. Custu referendum, difatis, a diferèntzia de sos abrogativos, non previdet unu tantu de votos (quorum) pro èssere validadu. Est una garantzia, custa, ca est su corpus eletorale chi detzidet pro nàrrere chi emmo o chi nono a una riforma costitutzionale votada dae su Parlamentu cun una majoria inferiore a sas duas partes de tres. A custa riforma l’ant votada 243 deputados de 400 e 112 senadores de 200. Pagos pro chi l’aerent aprovada deretu.
Ischimus chi custu referendum pertocat sa partzimenta de sas carrieras de sos giùighes, ma sighende s’allega de sos atores polìticos sa chistione non diat dèvere èssere custa ebbia. Dae s’opositzione faeddant de su su perìgulu de sutammìtere sso Pùblicos ministèrios a s’esecutivu e de sa disaura de unu Csm sorteadu. De cada manera Giorgia Meloni, forsis timende unu resurtadu che a su de deghe annos a como (sa riforma costitutzionale de Renzi), at naradu chi, eja o nono, non bi devent àere cunsighèntzias pro su guvernu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
