Sa Groenlàndia no est unu continente ca a livellu geogràficu apartenet a sa placa tetònica nordamericana. Sa Groenlàndia no est un’istadu ca a livellu polìticu apartenet a su Rennu de Danimarca. Sa Groenlàndia pro gente meda (colonialistas o colonizados pagu li càmbiat) no est nemmancu una natzione ca de gente bi nd’at paga. E non sunt de grandu agiudu sos meme in ue imbetzes de a Maduro, sos agentes de sa Dea ponent sos ferros a un’ursu, narende chi Trump at tentu a su presidente groenlandesu. Umiliada sa sàtira (ca non dat corfos a su potente) e umiliada sa dignidade de su pòpulu inuit.
Duncas movamus dae unu cunsideru chi podet èssere su puntu de comintzu de s’arresonu: sa Groenlàndia est una colònia. E ite tipu de colonialismu at sufridu su pòpulu de cussa terra? Pro nde nàrrere una: belle 150 fèminas ant fatu tzita de pretu contra a s’istadu danesu pro s’impiantu de un’ispirale contratzetiva sena su cunsensu issoro o a cua. Si contat chi petzi intre su 1966 e su 1970 ant impedidu a belle 4.500 fèminas de èssere mamas.
Pro nde nàrrere un’àtera (e torrende gràtzias a Björk pro las àere ammentas o fatas connòschere ambas), cherimus faeddare de sos test psicomètricos fatos a sas mamas groenlandesas discriminadas in contu de cumpetèntzia genitoriale petzi ca sos critèrios impreados non cumbinant cun sas esigèntzias de sas minorias? Sas diferèntzias culturales e sas barreras linguìsticas sunt motivu, pro sas autoridades de Copenaghen, de bogare sos pitzinnos nàschidos in Danimarca dae babbos e mamas de Groenlàndia: su 5,6% de sos crios de orìgine inuit chi istant in terra danesa est afidadu a istruturas de acollièntzia.
Duncas amus un’ocasione, comente europeos chi refudant sos imperialismos, americanos o europeos chi siant, de sustènnere s’indipendèntzia de cussa terra. Nen suta de Washington, nen suta de Copenaghen.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
