Sa fine de Air Italy arriscat su traballu de 1.500 personas Unu fallimentu pro una cumpangia naschida in su 2018 dae sa bècia Meridiana chi prima fiat Alisarda

Est duradu isceti duos annos su bolu de Air Italy cumpangia naschida in su 2018 dae sa bècia Meridiana, s’istòrica cumpangia de s’Aga Khan cun sede in Terranoa. Martis est istada posta in licuidatzione dae sos atzionistas Alisarda e Qatar Aiways.

Faghet duos annos dae cando, cun s’arribu de sa Qatar, beniat annuntziadu unu rinnovu de sa flota in s’arcu de 5 annos cun 50 aeroplanos pro serbire 10 milliones de passigeris e sa creatzione de 1.500 postos de traballu. S’hub printzipale abarraiat Milanu Malpensa, mentras sa sede tzentrale beniat cunfirmada in Terranoa. Beniant annuntziados puru bolus finas a New York, Miami, Bangkok.

In custos annos però sunt abarrados isceti is bisos. Pro ite in su 2017 (ùrtimu annu de Meridiana Fly), sas pèrdidas s’atestaiant a belle 40 milliones de èuros cun nd’unu faturadu superiore a 350 milliones, mentras in su 2018, primu annu de su partenariadu, si perdiant 160 milliones, su 57% de su faturadu. In su 2019, mancari s’aumentu de su faturadu, chi est abetadu 330 milliones de èuros, sas pèrdidas prevìdidas diant dèpere tocare sos 230 milliones de èuros, est a nàrrere su 70% de su faturadu.

S’istòria de Air Italy però benit de prus a largu, dae sa cumpangia chi aiat fundadu s’Aga Khan cun su nùmene de Alisarda in su 1963. Sa punna fiat promòvere su turismu in Sardigna. Aiat incumentzadu is operatziones de aerotaxi in su 1964 cun duos bimotores de oto postos, a pustis aiat cumintzadu a operare comente a vetore de lìnia in su 1966. In su 1991 su nùmene fiat istadu cambiadu in Meridiana chi posca fiat dibènnida Meridiana Fly. E posca s’iscummissa, persa, cun Air Italy.

Aici est arribbadu sa detzisione de pònnere sa cumpangia in licuidatzione. Una sebera chi at scidadu sa polìtica italiana e sarda puru chi pariat durmire finas a oe, mancari is protestas de is traballadores fiant andendi a in antis de meda tepus. Immoe Air Italy est dibennida un’emergèntzia pro ite 1.500 personas, una parte manna (550) in Sardigna, arriscant de abbarrare sena traballu e s’ìsula nostra diat aere àteros problemas cun is trasportos.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.