Sos Tazenda torrant cun una tournée e una boghe noa. “Bonas Noas” no est su tìtulu ebbia de sa tournée noa de sos Tazenda, ma fintzas unu messàgiu forte e craru de isperu e de cambiamentu. Sa noa de custa istajone est s’intrada in truma de Serena Carta Mantilla, 34 annos, cantante de S’Ulumedu cun un’esperèntzia musicale chi andat dae su jazz a sa mùsica clàssica, finas a sa World Music. Serena, chi at giai traballadu cun artistas de cabbale comente a Mario Biondi e a Renato Zero, l’ant seberada intre medas candidadas pro regòllere s’eredade de sas boghes istòricas de sa banda, sas de Andrea Parodi, de Beppe Dettori e de Nicola Nite.
«In unu momentu istòricu che a custu intendìamus su bisòngiu de abèrrere su palcu a una boghe feminile», ant naradu sos Tazenda a Radiolina «Serena est un’artista giòvana e de talentu, capatza de annànghere isfumaduras noas a sa poètica nostra. Cun issa semus printzipiende unu biàgiu chi sena duda at a agradare a su pùblicu».
Sa banda, famada meda in Sardigna, in Itàlia e foras puru, est traballende sena pasu in sa sala proas de Tàtari pro ammaniare su tour “Bonas Noas”. Sas primas datas sunt giai atatzadas: su 29 de martzu in su Teatru dei Marsi de Avezzano e sa die a pustis in Villa Varda de Brugnera. Su giru pigat su nùmene dae sa cantzone “Bonas Noas”, leadu dae s’album Fortza Paris de su 1995, unu cantu chi ponet a notu su podere de s’arte de dare rispostas positivas e rivolutzionàrias.
Gràtzias a s’estensione vocale isstraordinària de sa cantante noa, sos Tazenda ant a pòdere torrare a propònnere sa versione integrale de petzos Non poto reposare, essende chi sa boghe de Serena permitetde lòmpere a cuddas notas artas de Andrea Parodi, e chi nemos de sos cumponentes òmines de sa banda at pòditu egualare finas a como.
Paris cun sos membros istòricos Gigi Camedda e Gino Marielli, in su palcu b’ant a èssere sos cumpàngios fidados de biàgiu Massimo Cossu (chiterras), Massimo Canu (bassu) e Luca Folino (bateria). Cun una boghe noa e sa matessi ànima de semper, sos Tazenda sunt prontos a iscrìere unu capìtulu nou de s’istòria issoro, cumintzada in su 1988 e galu capatza de emotzionare generatziones intreas de ascurtadores.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
