Sa Giunta regionale at aprovadu unu provedimentu pro agiudare is comunos in ue est difìtzile agatare unu mèdicu de famìlia. S’acòrdiu dd’at firmadu Assessoradu regionale de s’Igiene e Sanidade cun is organizatziones sindacales de is medicos de meighina generale.
Sa detzisione serbit po individuare is logos de sa Sardigna acanta, fintzas pro pagu tempus, mancat s’assistèntzia sanitària de base, est a nàrrere su mèdicu de famìlia. In custos territòrios is mèdicos chi decidint de s’abèrrere unu ambulatòriu ant a retzire un intzentivu econòmicu de 2.000 èuros a su mese.
A mesura ponet in pràtica su chi est prevìdidu dae s’artìculu 10 de s’Acòrdiu integrativu regionale pro sa meighina generale. In àteros faeddos, sa Regione bolet sotare is mèdicos a andàre a traballare in is comunos in ue ddoe at pagu professionistas o in ue su servìtziu no ddoe est nudda totu.
«Cun custa initziativa faghimus unu passu concretu pro afortziare s’assistèntzia sanitària in su territòriu e pro torrare isceda a is tzitadinos chi bivent in is biddas de intro e in is comunos minores de sa Sardigna», at naradu sa presidenta de sa Regione Alessandra Todde. «S’idea nostra est de ingangulitzare is mèdicos a traballare in is biddas in ue mancat s’assistèntzia, afortziende in su matessi tempus sa rete territoriale de sa sanidade».
Tando, a is dutores chi ant a abèrrere un’ambulatòriu in is zonas identificadas comente mancantes de assistèntzia, sa Regione at a donare 2.000 èuros a su mese. Su contributu podet èssere reconnotu pro unu màssimu de duos annos dae cando s’aberit s’istùdiu mèdicu. Pro ischire is territòrios chi tenent prus bisòngiu de mèdicos, sa Regione at a impreare critèrios simples e ogetivos. Primariamente at a èssere leadu a cunsideru su raportu intre su nùmeru de abitantes e su nùmeru de dutores presentes in una zona. Cunforma a custos datos sas zonas ant a èssere classificadas segundu su livellu de carèntzia assistentziale: grave meda, grave, moderada o lèbia.
Sa presidenta Todde at ispiegadu fintzas chi custu sustegnu econòmicu s’agiunghet a àteros agiudos giai prevìdidos pro is mèdicos de famìlia, comente su de 1.700 èuros giai reconnotos a is càmitzas biancas chi partetzipant a is formas organizativas de sa rete territoriale de sa salude.
Ma s’istretègia de sa Regione non si firmat a s’amparu econòmicu. Sa punna est de creare, paris cun is territòrios e cun is sìndigos, unu sistema de servìtzios agiudet su traballu de is mèdicos. Intra is possibilidades ddoe est sa de traballare in intro de is Domos de comunidade, o in tretos postos a disponimentu dae is comunos.
De prus, sa Ras est valutende istrumentos de finanziamentu pro ativare servìtzios de segreteria, suportu amministrativu e àteras solutziones organizativas chi podent agiudare is mèdicos in sa gestione de ogna die de s’ambulatòriu. S’acòrdiu cun is organizatziones sindacales de sa medicina generale dd’ant firmadu su 25 de freàrgiu 2026 e istabilit chi in totu su territòriu de sa Sardigna podent èssere sustentadas prus o mancu 100 sedes mèdicas.
Sa lista de is zonas consideradas disagiadas in modu provisòriu at a èssere annoada cada annu, in antis de sa publicatzione de is sedes in ue mancat s’assistèntzia primària. De custa manera sa Regione at a pòdere adeguare is interventos a is apretos beros de is territòrios e garantire a is tzitadinos de agatare su mèdicu de famìlia sena dificultade.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
