Unu patrimòniu literàriu de prus de setanta annos in fines devenit bene colletivu e consultabile dae totus. Naschet in Otieri su primu Archìviu de sa poesia regionale in limba sarda, unu traguardu de grandu importu pro s’amparu e sa valorizatzione de s’identidade linguìstica e culturale de s’Ìsula.
S’initziativa est unu passàgiu istòricu sena pretzedentes: pro sa prima bia est aunidua pare, ordinadu e postu atzessìbile a su pùblicu su patrimòniu documentàriu mannu de su Prèmiu Otieri, su prus antigu cuncursu literàriu de sa Sardigna, fundadu in su 1956 e cunsideradu intre is prus betzos de Itàlia.
S’Archìviu regollet dècadas de produtzione poètica, testos premiados, manuscritos, fascìculos e documentos chi contant s’evolutzione de sa limba sarda e de s’espressione literària sua, trasformende unu patrimòniu, a s’ispissu custoidu in mosu ispartzinau, in una risursa istàbile pro istudiosos, amantiosos, iscolas e tzitadinos.
S’òpera de riòrdinu e inventariatzione dd’at finantziada Ministèriu de sa Cultura, a pustis de sa declaratzione de “interessu istòricu importante ” reconnota in su 2021 dae sa Subrintendèntzia archivìstica de sa Sardigna. Unu reconnoschimentu chi prèmiat su traballu longu de s’Assòtziu Prèmiu Otieri, dae annos impinnada in s’amparu de sa literadura in limba sarda.
Sa presentada ufitziale de s’Archìviu s’at a fàghere chenàbura su 17 de abrile a ora de is 16:00 in carrela de Amsicora 3, in Otieri. A s’eventu ant a leare parte autoridades, istudiosos e espertos de su setore.
Su programa previdet is saludos istitutzionales, sa presentada de su valore istòricu e culturale de s’òpera, s’illustratzione tècnica de su traballu de recùperu e inventariatzione, in prus momentos de aprofundimentu dedicados a is curiosidades essidas a campu durante s’anàlisi de is fascìculos.
Interessante at a èssere su momentu de is leturas poèticas, cun una seletzione de is cumponimentos prus significativos premiados dae su 1956 a oe, testimonia bia de sa richesa espressiva de sa limba sarda.
Cun sa nàschida de custu Archìviu, sa poesia regionale intrat a prenu tìtulu in su patrimòniu culturale natzionale, garantende sa trasmissione de sa memòria literària de s’Ìsula a is levas benidoras. Si tratat de unu passu importante siat pro sa cultura, siat pro s’amparu de su sardu comente a elementu identitàriu e istòricu de sa Sardigna.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
