«E chie si l’isetaiat de bìdere totu custa gente partetzipende a un’initziativa de s’Isportellu unu sero cagente de austu?» – at cummentadu faulapraeru Alessandro Podda in sa pàgina Facebook de s’Ufìtziu Linguìsticu Ogiastra. Pro chie connoschet su traballu de sos operadores linguìsticos ogiastrinos, però, no est istada un’ispantu: prusaprestu, un’àtera cunfirma de comente sas fainas in limba sarda e su ricu patrimòniu culturale de Loceri resessant a atràere e interessare residentes e turistas. Sa bidda, cun su tzentru istòricu suo, sa crèsia, su museu etnogràficu e sos murales, est difatis una prenda de traditziones e bellesa. Martis coladu, a merie a tardu, is caminos de sa bidda betza si nche sunt prenda de colores e mùsica, gràtzias a sa faina “A cuaddu de canna”, eventu aprontadu dae s’Ufìtziu Limba Sarda cun s’agiudu de s’Assòtziu Artis e Sonus. Protagonistas pipios e pipias, chi, chi a caddu de is cuaddeddos de canna, ant rugradu sas andaleddas de Loceri, trasformende·si in piticos esploradores de arte e memòria.
Sa tropa, ghiada dae sas notas de s’organitu de Francesco Podda – in pensu oto annos ma giai sonadoreddu – at fatu tapa in sos murales de Loceri, beras òperas de arte a chelu abertu. Acumpangiados dae Alessandro Podda, sos giòvanos “cadderis” ant bisitadu su Museu Sa Domu de s’Olia, ue ant ascurtadu istòrias de sa vida de is massajos, de su carrasegare e de sas traditziones de su logu. Posca ant sighidu cara a su Museu Molinos Bècios, in ue sunt arrimados sos istrumentos musicales populares de sa traditzione sarda. Su momentu prus galanu est arribbadu cando sas notas de sas launeddas ant prenadu s’àera. In cussu momentu, sos cadditos de canna sunt devènnidos beros cumpàngios de aventura, unende giogu e connoschimentu in un’esperièntzia chi at a restare in sa memòria de mannos e piticos.
Bòlidu dae s’amministratzione comunale ghiada dae su sìndigu Gianfranco Lecca, s’eventu at registradu una partetzipatzione manna de sas famìlias de su logu e istràngias, dimustrende chi sa limba e sa cultura sarda podent èssere trasmìtidas fintzas cun su giogu, faeddende a su coro de totus.
