Su 14 de cabudanni, in intro de is initziativas prevìdidas da su Fèstival Itaca, su comunu de Àrthana organizat un’eventu in mesu a sa natura, cun escursiones, ecuitatzione e unu cussìgiu comunale dedicadu a sa transitzione ecològica.
Fintzas ocannu, su 14 cabudanni, Àrthana partètzipat a su Fèstival IT.A.CÀ, su primu e ùnicu fèstival in Itàlia intregadu a su turismu responsàbile, cun unu programa prenu de fainas pro fàghere connòschere su territòriu ispantosu suo. A pustis de sa resessida de sas editziones coladas – in su 2022 in su bidditzolu nuràgicu de Orruinas e in su 2023 in su Nuraghe Sa Pèntuma – ocannu sa manifestatzione, intitulada “Viviamo il Gennargentu”, s’at a iscostiare in su Gennargentu Arthanesu, a costadu de sa Bidda e Silisé, e de su Nuraghe Unturgiadore.
S’addòbiu at a cumintzare a sas 8 in Pratza de Roma de Àrthana, cun s’arribu prevìdidu a sas 8.45 a su Nuraghe Unturgiadore. Dae inoghe, at mòvere un’escursione a pee conca a su Bacu de is Tzinnèberos cun su percursu “I passi dei Centenari“, ghiada dae s’escursionista ambientale Monica Piras. Sos partetzipantes ant a pòdere ammirare su nuraghe e sas richesas botànicas, geològicas e faunìsticas de su logu.
Pro sos amantiosos de ecuitatzione, at a èssere possìbile a pigare parte a un’escursione a caddu organizada dae su Tzìrculu Ecuestre Monte Idolo de Àrthana e dae su Tzìrculu Ecuestre Taloro de Fonne. Su percursu at a mòvere dae Tedderieddu, pro 4 km cun unu dislivellu de 230 metros, classificadu comente escursionìsticu (E). Pro partetzipare est a tènnere sabatas de trekking, bestires adatos, u’ampudda cun unu litru e mesu de abba e unu pràngiu a sicu, opuru s’at a pòdere prenotare su pràngiu in unu cuile de su logu.
S’escursione at a èssere ghiada dae sa GAE (Guida Ambientale Escursionistica) Monica Piras. Durante sa pàusa pràngiu, sos partetzipantes ant a pòdere tastare sos produtos de su logu in cuile de “Forru”.
A merie, a ora de is 16:30, est in programma unu cunvegnu dedicadu a sas erbas ofitzinales de su Gennargentu, tentu dae sos dotores Sumas e Sestu, in Tedderì, logu famadu pro sos longhifresos seculares suos. Posca, a sas 18:00, s’at fàghere una setziada istraordinària de su cussìgiu comunale, pro chistionare de ispeculatzione energètica e de sa transitzione ecològica.
Sa die s’at a concruire in festa: dae sas 19:00 su grupu folclorìsticu Abba Frida e s’artista Gavino Murgia ant a istentare su pùblicu presente cun ballos e mùsica e, a sighire, b’at a àere una degustatzione de binos de sa cantina arthanesa Cabiddu e una chena cun su pastore.
Pro nde ischire de prus est a mutire a sos nùmeros 320 4921523 e 379 2878745.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
