Si narat “La tua memoria è la nostra memoria”, su progetu aparitzadu dae su Comunu de Boruta chi punnat a sa realizatzione de un’archìviu de sa memòria privada e familiare de sos Borutesos e de sos sardos. Totu girat a fùrriu de Sa Bèrtula, dae su latinu avertula “istèrgiu tèssidu pro biàgiu”, intesu comente sìmbulu acanta si ponet totu su chi si tenet bisòngiu, impreadu dae generatziones de borutesos.
Su progetu previdet su recùperu, s’allogu e sa valorizatzione de trastes, bestimentas, mobìlia, fotografias, iscritos e totu su chi podet serbire a documentare abitùdines e traditziones. Sa faina de “memòria” previdet fintzas su tzensimentu, sa duplicatzione e sa catalogatzione de materiale fotogràficu e filmados amatoriales chi pertocant su territòriu regionale sardu.
Assentada de custa manera, sa banca de datos at a permìtere de cumpònnere unu corpus de materiale audiovisivu inèditu e de cabbale pro s’istùdiu de s’istòria, de sa memòria locale e peri de sa toponomàstica chi oramai est perdendesi.
At naradu su vitzesìndigu Renzo Solinas, moderadore de s’initziativa: “Est pretzisu chi totus leent parte a custu progetu in ogna manera: cun ogetos, testimonias verbales (contos, ditzos e gosi sighende), fotos, filmados amatoriales. Totu podet serbire pro torrare a fraigare s’istòria nostra”.
Su progetu faghet parte de sas fainas chi su comunu de Boruta, ghiadu dae su sìndigu Silvano Arru, est aparitzende pro chircare de arrèere s’ispopulamentu. Torrare a s’impossessare de s’istòria e cuberare sas raighinas pròpias permitit de s’amorare torra de su territòriu de orìgine, permitit de castiare prus addae de sos pagos chilòmetros chi istàgiant Boruta dae sas tzitades e torrare vida e ispetu pro su benidore a su Meilogu.
Sa primu cosa chi s’at a fàghere at a èssre s’inchingiamentu in sa Domo Museu de Boruta de sa “Mustra Sa Bèrtula” su 16 nadale 2022 a sas 16:30 dedicada a su borutesu Foricu Ruiu, unu de sos ùrtimas biddaresos a si l’àere posta. Sa mustra est ammaniada dae su curadore Sandro Falchi, unu mastru de pannu chi est resessende a cumpònnere sos filos de sa memòria de sos borutesos.
Foricu Ruiu at bìvidu cun sa bèrtula a totu vida. “Fiat comente a un’isposa chi ischiat totu de isse e nde sighiat su passu — narant sos organizadores — Sa Bèrtula fiat pro isse una cumpàngia de aventuras, istèrgiu pro arrimare sa cosa, istadea pro pesare e medire sas provistas. Calicunu contat chi in sa Bèrtula de Ruiu bennerent carrados finas criaduras, comente si faghet oe cun sas fàscias o sos marsùpios”.
Foricu Ruiu at marcadu un’època chi immoe Boruta cheret contare e avalorare e chi podet devènnere un’àndala pro sas chentinas de istòrias chi sa comunidade custoit in sinu.
Sa mustra de SaBèrtula at a abèrrere unu fine chida a in antis de Nadale, cun sa manifestatzione de Sardegna Integrata — acanta b’at a èssere mùsica, isport e cultura. Chenàbura sero a sas 19:30 at a cantare sa Dino Nurra Band de mùsica folk tataresa; a sas 22:30 DJ a cunfrontu intre sos viniles annos 80 de su dj Paolo e sa consolle de sos millennials de su fìgiu Peppo.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
