Eris in Roma in s’Istitutu de Santa Maria in Aquiro a Roma, s’addobbiu “L’Italia delle Minoranze Linguistiche: Idee e Strategie per il Futuro”, organizadu subra de initziativa de sa Senadora Elena Testor cun su Patrotzìniu de s’Anci at tzelebradu su de 25 anniversàrios de sa Lege 482/99 de meda importu pro s’amparu de is minorìas linguìsticas istòricas in Itàlia.
Sa cunferèntzia, introduida dae su diretore de Ejatv Tore Cubeddu, at dadu una panoràmica pro canto pertocat s’importu e is disafios de custa lege, sutaliniende s’impatu suo in s’amparu de culturas e limbas ùnicas. Marco Stolfo de s’Universidade de Torinu at ammentadu su percursu istòricu de sa normativa, mentras Vincenzo Santoro, responsàbile cultura Anci, at faeddadu de istrategias pro su benidore de iscomunidades de minorìa.
Est istadu finas presentadu s’assòtziu “Artìculu 6”, nàschidu dae s’addòbiu de realidades impinnadas in s’amparu de is minorìas linguìsticas. Sabrina Rasom, Andrea Deluca e Leo Virgili ant faeddados de is progetos e is obietivos de custa rete noa, ispirada a s’artìculu 6 de sa Costitutzione italiana.
Is traballos ant bidu sa partetzipatzione de deputados e senatòrios, chi ant sutaliniadu s’importu de afortiare su Fundu natzionale destinadu a sa lege, pro garantire un’amparu cuncretu a is comunidades linguìsticas. S’assòtziu “Artìculu 6” est abertu pro initziativas noas e collaboratziones.
