S’amministratzione comunale est traballende a unu progetu chi ìntegrat sa memòria istòrica cun sa tecnologia pro creare ispàtzios pùblicos inclusivos, ispirende·si a sa traditzione sarda.
Su Comunu de Àrthana tenet unu progetu de rigeneratzione urbana ambitziosu chi cheret aunire sa traditzione e s’innovatzione, puntende subra su recùperu e sa valorizatzione de sos tretos pùblicos comente logos de addòbiu e sotzialidade. Ispiradu a su cuntzetu de “su leminàrgiu”, su de sa ghenna de domo, su progetu punnat a torrare a sa comunidade cussos logos chi unu tempus rapresentaiant su coro de sa bidda, in ue giòvanos e betzos s’agataiant pro s’istoriare e trasmìtere connoschimentos.
Sa rigeneratzione urbana chi Àrthana cheret atuare non pertocat su megioru fìsicu de sos ispàtzios ebbia, ma fintzas su recùperu de sa funtzione sotziale issoro. “Su leminàrgiu”, difatis, non fiat petzi s’intrada de sa domo, ma unu logu de iscàmbiu de esperièntzias e contos. Cun custu progetu de Àrthana, pro cussu, puntat a realizare àreas pùblicas chi promovant su diàlogu intergeneratzionale, in ue tempus coladu e benidore s’adobiant pro favorire sa trasmissione de connoschèntzias intre diversas generatziones.
S’amministratzione comunale, in lìnia cun s’obietivu de preservare s’identidade culturale de sa bidda, at seberadu de impreare materiales locales, comente su granitu, e de integrare elementos architetònicos acapiados a sas traditziones de su passadu. Sos interventos ant a èssere orientados a sa creatzione de ispàtzios bellos, atzessìbiles, sustenìbiles e inclusivos, impreende sa tecnologia comente trastu pro megiorare sa calidade de sa vida de sos tzitadinos. Su leminàrgiu, sìmbulu de sa traditzione orale e de sa comunidade, at a èssere arrichidu cun innovatziones comente connessione a ìnternet, abbistesa artifitziale e pannellos multimediales, rendende custos tretos ùtiles pro mannos e minores
Sa figura tzentrale de custu progetu sunt sos betzos. S’invitu de s’amministratzione a cumpartzire sas istòrias pròpias e esperièntzias devenit unu puntu fundamentale pro su recùperu de su patrimòniu immateriale de sa comunidade. Pro favorire custu, at a èssere creada un’istatzione de iscurtu pro regòllere e furriare in suportos digitale sas traditziones locales. Totu custos contos ant a èssere atzessìbiles a chie si siat pro mèdiu de percursos multimediales e fainas de animatzione intergeneratzionale gràtzias a s’introdutzione de sa figura de s’animadore de caminu.
Sa rigeneratzione non si lìmitat a sos ispàtzios pùblicos, ma at a interessare totu sa bidda de Àrthana, cun su recùperu de sas iscaleras de su tzentru istòricu,cun sa creatzione de s’Àndala de s’Abba e sa realizatzione de òperas de arte de istrada.
Su sìndigu de Àrthana, Angelo Stochino, sutalìniat chi su progetu est unu disafiu, ma unu disafiu chi balet su dolu de afrontare.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
