Una borta b’aìamus sa sàtira, oe b’amus su recramu identitàriu. Sas acontèssidas de Andrea Pucci e sas batutas (betzas) suas indiritzadas a sos sardos, torradas a bogare a campu in clima sanremesu, sunt su termòmetru perfetu de una coerèntzia polìtica chi viàgiat a targas bàrigas.
Giorgia Meloni s’est posta a boghes (cun unu post) faeddende de “tzensura preventiva“. Comente a nàrrere: “Cara manca progressista pesada a pane e woke, tue cheres tupare sa buca a calicunu, in antis chi l’abèrgiat, petzi ca su curriculum suo no agradat a tie e a sos cumpàngios tuos chi bos seis postos a bàrdia de su chi si podet e de su chi nono”.
Làstima chi semus faeddende de unu post de su presidente de su Cussìgiu pro un’eventu trasmìtidu dae sa tv de istadu chi no est controllende s’opositzione. Làstima chi Pucci andat bene e Natangelo nono. Su chi tocat a nàrrere àteru est.
Est inoghe – difatis – chi si manifestat sa contradditzione de s’orgoglionismu sardu. Immaginemus·nos·la s’iscena: si Pucci, carchi annu a como, no aeret naradu nudda contra a sa Sardigna in sos monòlogos suos, oe, su bonu de cussos orgoglionistas chi tando pedeit sa conca de su tale, cun probabilidade manna, diat pòdere istare in s’oru de sa prèmier befende·si·nde de una manca chi s’ofendet pro cale si siat cosa e tzichirriende: “Eh! Ma tando est beru chi non si podet nàrrere prus nudda!”.
Sa làcana de sa libertade de espressione, diat pàrrere, cumbinat duncas cun sa de sa corte pròpia. Si Pucci ingiùrgiat a àtere est libertade sacrosanta; si ingiùrgiat a nois si pesat su “Sardos, ischidemus·nos!” (est a nàrrere “Woke!”). Si tocat a nois tocat de bi colare cun una gomma (“cancel”).
Cale est sa morale de totu custu? Semus totu cantos paladinos de su pensu lìberu finas a cando su còmicu non detzidet de colare in tretos nostros. Sàtira bèngiat (semper chi lu siat), ma in domo non colet, diamus pòdere nàrrere mudende unu ditzu. Duncas: in antis sa coerèntzia, a pustis s’orgògliu (e a banda s’orgoglionismu).
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
