Su Comunu de Biddanoa ‘e Tulu (SU) at publicadu su bandu de sa de XVII editziones de su Prèmiu de Poesia in Limba Sarda “Benvenuto Lobina”. Su cuncursu donat s’oportunidade a totu is poetas de s’Ìsula e finas a is chi istant foras de sa Sardigna, de espressare sa creatividade issoro in cale si siat variante de sa limba sarda, bastet chi non nche isciaddant is baranta versos.
Su Prèmiu s’articulat in duas setziones distintas: sa poesia a tema de amore (Setzione A) e sa poesia a tema lìberu (Setzione B), chi podet èssere cumposta in versos isortos, lìberos o in rima. Is òperas presentadas depet èssere inèditas e non depent àere retzidu prèmios in àteros cuncursos literàrios.
Is cumponimentos ant a èssere valutados dae una giuria de espertos cumposta dae Salvatore Tola (Presidente), Franca Marcialis (Vitze Presidente), Paolo Boi e Sandro Ghiani. Pro ambas is setziones, ant a èssere assignados prèmios pro is primos tres classificados, sighidos dae mentovos de onore. Cada autore at a pòdere retzire unu primu prèmiu ebbia, mancari siat possìbile partetzipare a ambas is categorias.
Is elaborados ant a dèpere èssere imbiados intro domìnigu su 14 de abrile 2024, siat cun posta ordinària, siat cun posta eletrònica. In su casu de imbiu cun posta ordinària, is òperas ant a dèpere èssere firmadas cun unu pseudònimu e acumpangiadas dae un’àtera busta cun is datos de s’autore. In sa busta printzipale, su cuncurrente at a dèpere inditare in manera crara sa setzione chi partètzipat.
Pro s’imbiu cun curreu eletrònicu, su testu de is òperas at a dèpere èssere insertadu comente alliongiadu in formadu PDF non modificàbile e firmadu cun unu pseudònimu. In unu segundu alliongiadu si depet ispetzificare su pseudònimu, su nùmene de s’autore, s’indiritzu, su nùmeru de telèfonu e s’indiritzu de posta eletrònica.
S’indiritzu de su cuncursu est: premio.benvenutolobina@gmail.com. Sa tzerimònia de premiatzione s’at a fàghere in Biddanoa ‘e Tulu s’8 de làmpadas.
Inoghe is règulas de su cuncursu
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
