Ossìgenu pro su Casteddu: tres puntos contra a s’Udinese In sa Sardegna Arena acabat 2 a 1. Primu gol de s'Udinese, posca sa 'remuntada'

Est istada una semana difitzile meda pro su Casteddu ma immoe su sole est torradu. A pustis de sa partida pèrdida in Verona, s’iscuadra de Lopez oe at bìnchidu cun su resurtu de duos a unu contra a s’Udinese. Cussos pigados a merie sunt tres puntos ca donant morale a su Casteddu, ca fiat in nd’unu momentu de crisi, e donant puru  assèliu a su mister Lopez. De ogni manera galu abarrant problemas, mescamente pro su chi pertocat su giogu e carchi isbàlliu mannu.

Pro sa cronaca, sa partida no fiat cumentzada bene pro su Casteddu ca a su 10′ de su primu tempus aiat giai pigadu unu gol: Barak si nche buffat a tres defensores, donat sa bocia pro Lasagna chi dae duos passos dda ponet a intru. Is meris de domo faghent su paregiu a su 21′ gratzias a unu corpu de conca de su bomber Pavoletti. Su gol vitoria arribat a su 84′: Cossu tirat su corner, Ceppitelli arribat in mesu a s’area e de conca adobbat a su portieri.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.