Dae is ruinas de sa gherra a is àulas universitàrias sardas. In totu sunt deghessete is istudiantes palestinsos arribbados a Sardigna gràtzias a su progetu de acasàgiu promòvidu dae sa Regione Sardigna paris cun is Universidades de Casteddu e Tàtari in intro de corridòrios universitàrios sustentados dae sa Farnesina. Giòvanos bènnidos dae sa Tira de Gaza, medas dae Khan Younis, Deir al-Balah e dae is campos de pròfugos de Jabalia, Al Shati e Al-Nuseirat, acanta is universidades issoro como sunt rutas suta is bombas de s’IDF.
Oto istudiantes sunt arribbados a Casteddu, mentras àteros noe sunt aterrados a S’Alighera pro sighire is istùdios in s’Universidade de Tàtari. Tres pitzocos e batòrdighi pitzocas chi, a pustis de meses dea gherra, ant agatadu in s’ìsula una possibilidade bera de pòdere torrare a leare su percursu acadèmicu issoro e duncas torrare a castiare a su benidore cun ispetu bonu.
Ddos ant retzidos is rapresentantes de is assòtzios umanitàrios, de is ateneos sardos e de is istitutziones regionales. Deretos de lòmpere a Sardigna is istudiantes ant bòlidu torrare gràtzias a chie ddos at agiudados a istudiare a pustis de totu is tribulias bìvidas in is ùrtimos meses.
S’initziativa naschet dae una deliberatzione aprovada dae sa Giunta regionale in su cabudanni 2025 pro proposta de s’assessora de sa Pùblica Istrutzione Ilaria Portas. Su progetu previdit unu fundu de 120 mìgia èuros destinadu a deghe bussas de istùdiu de 12 mìgia èuros ognuna, partzidas intre is ateneos de Casteddu e Tàtari, cun su sustennu de is Ersu pro allògios e servìtzios.
“Sa Sardigna bolet donare unu signale de paghe, tziviltade e isperu”, at naradu s’assessora Portas, sutaliniende comente su deretu a s’istùdiu non depat èssere burradu dae is gherras. Unu messàgiu cumpartzidu fintzas dae sa presidenta de sa Regione Alessandra Todde, chi at donadu su bene bènnidos a is giòvanos palestinesos: “Inoghe no ais a èssere istudiantes istràngios ebbia, ma parte de una comunidade chi connoschet su valore de sa dignidade, de s’acasàgiu e de sa libertade”.
S’arribu de is pitzocos palestinesos rapresentat fintzas su contributu de sa Sardigna a unu progetu natzionale prus ampru chi at giai permìtidu a chèntinas de giòvanos isfollados dae Gaza de sighire is istùdios in Itàlia. Unu gestu cuncretu de solidariedade chi in prus de s’istùdiu, donat a custos istudiantes un’isperu de vida serena a pustis de is disauras de sa gherra.
