Cada annu, su 14 de làmpadas, pro initziativa de s’OMS, in totu su mundu si tzèlebrant su World Blood Donor Day, est a nàrrere sa Die de su donadore de sàmbene. Ocannu su tema est “20 annos de donatziones: gràtzias donadores de sàmbene!”.
Difatis custu est su de binti anniversàrios de sa campagna de sensibilizatzione nàschida in su 2004. Sa Die mundiale de su donadore de sàmbene est un’oportunidade pro torrare gràtzias a is voluntàrios de totu su mundu pro su chi ant fatu e una manera pro onorare s’impatu mannu de su gestu issoro in sa vida de is malàidos. Est fintzas su momentu pretzisu pro afrontare is disafios continos e atzelerare su progressu cara a unu benidore in ue sa trasfusione de sàmbene segura siat atzessìbile in manera universale.
Sa Sardigna est una de is Regiones acata si donat de prus, ocannu puru difatis is donatziones sunt aumentadas. Mancari gasi custu non bastat a suprire sa rechesta dèpida a su nùmeru mannu de malàidos de patologias chi dipendent dae is trasfusiones. Serbit prus impinnu e un’interessu prus mannu de is tzitadinos pro fàghere crèschere sa cultura de sa donatzione, pro more de sarbare e curare medas prus vidas.
In Ogiastra, su Tzentru trasfusionale de s’Asl, paris cun s’Avis comunale de Tortolì, at organizadu pro oe, su14 de làmpadas una regorta ispetziale de sàmbene in sa marina de Orrì. Pro chi at a detzìdere de donare, in at a èssere regalada una malliedda de su progetu regionale “Dèv – Donare è vita”. S’autoemoteca de s’Asl at a èssere in disponimentu de is tzitadinos dae is 8.00 a is 10.30, cara a su chioscu “Le Mimose”.
S’Unidade Organizativa Trasfusionale de regorta sàmbene de su Distretu de Cuartu partètzipat a s’initziativa de su 14 làmpadas cun una die dedicada siat a is donatziones siat a s’educatzione sanitària. Su personale at a èssere in disponimentu de is tzitadinos pro informatziones in contu de donatziones de sàmbene e de maladias chi si podent curare cun is trasfusiones de emocumponentes. Dae is 8.00 a is 11.30 si podent fàghere is donatzione de sàmbene, dae is 12.00 tzerimònia de ringratziamentu, saludu de is Autoridades, addòbiu cun is espertos. Pro prenotare est a telefonare a is nùmeros 0706097327-7324-7321, o iscrìere a s’idiritzu de curreu eletrònicu: uot.quartu@aslcagliari.it
In su Tzentru de Regorta de su Sàmbene de su P.O. San Marcellino de Murera, is donatziones s’ant a pòdere fàghere oe, su 14 de làmpadas, dae is 8.30 a is 12.15 a mangianu. Ddoe at a èssere unu cumbidu postu a disponimentu dae s’AVIS de Murera-Sarrabus. Sa mail de su Tzentru pro comunicatziones: uot.muravera@aslcagliari.it
In Ìsili imbetzes, acantu sa regorta de sàmbene est istada fata mèrcuris coladu in su Tzentru regorta de su sàmbene de s’ispidale de Ìsili, ddoe est istadu finas unu momentu de cunfrontu e dibata in sa sala cunferèntzias de s’ospidale San Giuseppe pro is operadores de su presìdiu matessi. Sa referente de s’Unidade regorta sàmbene de su San Giuseppe Dotora Maria Balata at ispiegadu s’organizatzione de s’U.O.Trasfusionale chi dae pagu at otentu su reconnoschimentu de Polu de Reclutamentu donadores de tzèlulas istaminales.
In sa fotografia, is infermieris donadores de s’ispidale Nostra Sennora de sa Mercede de Lanusè, chi ant aderidu a su progetu regionale “Dèv – Donare è vita”.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
