Su chi unu cras s’at a pòdere nàrrere est chi in su 2025 b’at àpidu una gherra intre un’istadu ebràicu e una repùblica islàmica. Su note intre su 12 e su 13 de làmpadas, intre giòbia e chenàbura, 300 e barda intre mìssiles e bombas, nche sunt rutos in terra iraniana.
Duas sas acontèssidas chi de pagu ant antitzipadu s’optzione bèllica de su primu ministru israelianu Benjamin Netanyahu e de su guvernu suo: una pertocat sa risolutzione de s’Agentzia pro s’energia atòmica de sas Natziones unidas (s’Iaea) cun 19 de 35 votos acusende a Teheran de non chèrrere rispetare sos tratados internatzionales in contu de nucleare; sa segunda est imbetzes ligada a sa permanèntzia de Bibi a caddu, sende chi 61 de 120 parlamentares de sa Knesset ant respintu sa motzione de discunfiàntzia presentada dae s’opositzione (detzisivu s’acordu cun sos ortodossos).
Netanyahu, duncas, no at pèrdidu tempus dende s’ok a sos bombardamentos de unos cantos sitos interessados dae su programma nucleare e missilìsticu iranianu e eliminende tres cabos militares e unos cantos iscientziados chi traballaiant a su programma atòmicos. Ma in prus de no àere pèrdidu tempus, su cabu de su guvernu sionista at antitzipadu finamentas sa prassi de s’Onu: su passàgiu a pustis fiat su de presentare sa motzione a su Cussìgiu de Seguresa pro l’aprovare (e in custu casu dende su via lìbera a sas santziones) o mancu.
De onni manera, a su presente s’Iran possedet 400 tonnelladas de uràniu arrichidu a su 60%: pro su fràigu de unos binti nùcleos, movende dae sas cantidades mentovadas, s’arrichimentu nche cheret giutu a su 90%. De prus, pro fàghere sas bombas bi cheret fintzas s’innescu e su sistema pro chi sas bombas matessi lompant a destinatzione. Perunu oriolu reale a su presente in Israele, duncas, finamentas pighende in cunsideru su sistema avantzadu de difesa de Tel Aviv. Pro gasi, si cunfirmat su contu chi si bi l’as a beru, s’atòmica, non ti bombardant; ti bombardant si la cherent issos ebbia.
Sa risposta iraniana su note de su 13, cun 150 mìssiles balìsticos, serrat custu primu round. Comente at a sighire l’amus a bìdere luego.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
