Sa poesia comente istrumentu de identidade, memòria e valorizatzione de sa limba sarda. Custu est su messàgiu chi est essidu a campu dae su Prèmiu de poesia in limba sarda “Benvenuto Lobina”, tzelebradu giòbia coladu, s’11 de làmpadas, in Biddanoa de Tulu.
Sa premiatzione, ammaniada in ocasione sa Festa de Santu Giulianu Màrtire e de sa Sagra de sa Cerèsia, s’est tenta in Sa Pratzita dedicada a s’iscritore biddanoesu.
Lòmpidu a sa XIX editzione sua, su cuncursu est unu de is addòbios literàrios prus prestigiosos dedicados a sa limba sarda, acanta poetas, iscritores, amantiosos de poesia e bisitadores acudint cada annu dae totu sa Sardigna.
Sa giuria (Sandro Ghiani, Franca Marcialis, Paolo Boi, e Anna Cristina Serra), reunida s’18 de maju coladu pro esaminare is òperas presentadas intro su 7 de abrile 2026, at donadu su primu prèmiu de sa Setzione A a Antonio Ignazio Garau de Aristanis cun sa poesia “Ita at a essi?”. Su componimentu, rimadu in arrepentina a sa dereta, cantat su brègiu chi naschet cando nos incaressimus a chie tenet bisòngiu, su gosu chi tenimus cando bivimus cun bonesa e rispetu de is àteros. Sa poesia de Garau nos sotat a totus a tènnere semper, cun passièntzia, in cusideru is àteros. Pro sa giuria su valore sa poesia, in prus de s’impreu particolare de s’arrepentina, est in su chi narat e comùncat.
Su segundu prèmiu est andau a su componimentu “Pipiu” de Teresa Piredda de Iscroca, e su de tres a “A-MO-RI” de Gigi Angeli de Palau.
In sa setzione B est arribbada prima Maria Teresa Rosu de Lùvula cun s’òpera “Ispinas in s’anima”. Custa sa motivatzione de sa giuria: Sa tribulia de òmines, fèminas e pipios sunt ispinas in s’ànima de sa poetissa. Poetissa chi si preguntat cando sa dea de sa luna, Selene, at a torrare a illuminare sa mente umana, pro chi potzat progetare unu benente sena de iscurigore e dare torra isperu e ditza a is disamparados de sa terra. Custos sentimentos sunt trasmìtidos a su ligidore cun una lìrica originale e personale, chi in cada telada espressat una richesa de imàgines simbòlicas.
Segundu prèmiu, ex aequo “Po poder bìvere” de Pùliga Giuseppe Angelo de Nughedu S. Vitòria e “Seu bandendu” de Erriu Dante de Silius. Infines, su de tres prèmios est andadu a sa poesia “Bastimentos” de Manuel Cherchi de Carbònia
Inoghe is intevistas a is protagonistas de su prèmiu, contivigiadas dae s’Ufìtziu Linguìsticu Sarcidanu Barbàgia de Seulu.
Sa manifestatzione est dedicada a Benvenuto Lobina (Biddanoa de Tulu, 1914 – Tàtari, 1993), una de is figuras prus importantes de sa literatura sarda de su Nòighentos. Poeta e iscritore bilìngue, Lobina at dedicadu sa vida sua a sa literatura e at seberadu su sardu comente mèdiu pro contare sa realidade, s’istòria e s’ànima de sa terra sua.
Pustis de is primas esperièntzias poèticas e de cuntatu cun is ambientes culturales de su Futurismu in Casteddu, Lobina bivit in primu persona is esperièntzias tràgicas de sa gherra de Etiòpia e de sa Segunda Gherra Mundiale.
Sa cunsagratzione sua arribbat in su 1964, cando binchet su Prèmiu Otieri cun sa poesia “Chini scidi”, diventende su primu autore campidanesu a otènnere custa primiatzione importante. Àteros reconnoschimentos arribant in is annos sighentes, cunsacrende·ddu comente unu de is iscritores sardos prus mannos de su sèculu XX.
Tra is òperas suas, sa prus connota est “Po cantu Biddanoa”, unu romanzu istòricu iscritu in limba sarda e italiana premiadu in su 1984.
