Resèssida manna, pro sa prima editzione de su fèstival de literadura pro s’infàntzia in su padente de Seleni.
Sa primu editzione de su Fèstival Ridda Selvaggia, dae su 6 a su 8 cabudanni 2024, in su Parcu Archeològicu de Seleni in Lanusè, est andadu mègius de su chi is organizadores s’isetaiant. Organizadu dae su Comunu de Lanusè in collaboratzione cun su Fèstival Tuttestorie de sa Literadura pro Pipios, s’eventu at trasformadu pro tres dies su padente de Seleni in unu palcoscènicu acanta sunt andadas in iscena istòrias, mùsica, arte e maghia.
Su fèstival est cumentzadu chenàbura su 6 de cabudanni cun is saludos de s’Amministratzione Comunale de Lanusè, chi at donadu s’inghitzu a unu fine de chida prenu de fainas culturales dedicadas a sa pitzinnia e a s’interatzione cun sa natura. Sa resèssida de su fèstival s’est bida giai dae in deretura, cun una partetzipatzione manna de pitzinnos, famìlias e apassionados de literadura.
Una de is cosas prus apretziados est istada sa partetzipatzione de professionista, finas de importu natzionale, chi ant arrichidu su programa, comente Bruno Tognolini, Silvano Vargiu, Donatella Martina Cabras, Simone Perra, Catia Castagna, Alessandro Melis, Elena Iodice, Punti di Vista, Federica Buglioni, Irene Penazzi e Emanuele Ortu. Sos artistas ant conchistadu su pùblicu cun laboratòrios creativos, performance poèticas e ispetàculos chi ant unidu contos, mùsica, dantza e su limbàgiu misteriosu de sos àrbores.
Sos laboratòrios sunt istados su coro de su fèstival, cumbinende annestru, arte e disaogu. Sas famìlias ant partetzipadu cun brègiu a sas fainas propostas, comente sas dedicadas a s’esploratzione de su raportu intre infàntzia e ambiente naturale. Su padente de Selène, cun sos ispàtzios ampros suos e s’atmosfera ùnica sua, est istadu s’iscenàriu ideale pro torrare a iscobèrrere s’acàpiu fungudu intre òmine e natura. Su tema de ocannu, ispiradu a s’òpera de Maurice Sendak “Nel paese dei mostri selvaggi”, at promòvidu un’acostamentu rispetosu cara a s’ambiente, invitende sos partetzipantes a “ascurtare” sa boghe poètica de sas matas e de su padente.
Sas fainas de su fèstival non si sunt limitadas a sos pipios ebbia, ma ant interessadu fintzas sos mannos, chi ant agatadu in su programa propostas adatas a totu sas edades. Sas famìlias ant tentu s’oportunidade de cumpartzire momentos de iscoberta e creatividade, arrichende su ligàmene intre babbos e fìgios gràtzias a su giogu e sa narratzione.
Sa manifestatzione “Ridda Selvaggia” est istada possìbile gràtzias a sa collaboratzione de numerosos voluntàrios, iscolas, assòtzios e collaboradores comente sa Fundatzione de Sardigna e La Nuova Luna. A s’agabbu de sa manifestatzione, s’Amministratzione Comunale de Lanusè at torradu gràtzias a sos chi ant contribuidu a su bonu resurtadu de custa primu editzione, sutaliniende s’importu de eventos che a custu pro sa valorizatzione de su territòriu e sa promotzione de sa cultura.
Sa serrada de su fèstival at lassadu in sos partetzipantes su disìgiu de repìtere s’esperièntzia de ocannu, cun s’addòbiu giai atatzadu pro s’annu chi benit. Cun “Ridda Selvaggia” unu caminu nou s’est abertu in su panorama culturale de sa Sardigna, capassu de avalorare s’infàntzia e su ligàmene suo cun sa natura e sa creatividade.
