Sa de deghessete editziones de su “Premio Andrea Parodi”, cuncursu de prestìgiu mannu in intro de sas manifestatziones dedicadas a sa world music, l’at bìnchidu Sandra Bautista, cantadora catalana de Bartzellona. Su prèmiu l’ant fatu in Casteddu dae su 10 a su 12 de custu mese in su Teatro Massimo.
Sandra Bautista, conchistende sos favores de sa giuria ghiada dae sa diretora artìstica Elena Ledda, at otènnidu su diritu a una bursa de istùdiu de 2mìgia e 500 èuros in prus de sa possibilidade de sonare e de cantare in unos cantos fèstival partner de su “Parodi” (“Jazz in Sardegna” e su friulanu “Folkest”) e in su “Parodi” matessi.
Sa cantadora barcelonì at bìnchidu fintzas su prèmiu de sa crìtica, sas mentziones pro mùsica e arrangiamentu, su prèmiu Bianca d’Aponte International e su prèmiu de sos giòvanos in sala.
Galu: su prèmiu de sa giuria internatzionale si nche l’at pigadu imbetzes s’argentinu Gabo Naas; su pro sa mègius cover de Andrea Parodi l’ant dadu cun mèritu parìvile a su colombianu Valdi (fintzas mentzionadu intre sos mègius intèrpretes) e a su sitzilianu Cico Messina (chi si nche giughet in fatu suo finamentas su prèmiu de sos cuncurrentes). A su friulanu Alvise Nodale, in fines, sa mentzione pro su mègius testu.
Su “Prèmiu Andrea Parodi – World Music in Sardegna” est unu progetu musicale internatzionale in ue in intro suo b’at unu cuncursu che a su de sa chida colada, unu fèstival, e eventos collegados comente masterclass, cunvegnos, presentadas de libros e de discos e itineràrios de annestru chi ìntegrant s’oferta culturale indiritzados a sos artistas finalistas e a sa giuria interessada.
Su cuncursu est gratùitu e abertu a artistas de totu su mundu cun limitatzione peruna (francu pro sos minorennes). Sas dimandas de iscritzione cherent imbiadas intro de su 31 de maju de s’annu a pustis de su bandu (chi lu pùblicant su mese de nadale).
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
