Est a disponimentu dae unas cantas chidas in You Tube sa sèrie intrea de A Boghe leada “Su cantu a tenore pro contare sa Sardigna”, regia de Davide Melis, cun sa diretzione artìstica de Sebastiano Pilosu. Ses episòdios de 50 minutos cadaunu pro contare sa Sardigna pro mèdiu de su cantu a tenore.
Como, A boghe leada “Su cantu a tenore pro contare sa Sardigna”, est totu disponìbile in YouTube. Sa regia est de Davide Melis, cun sa diretzione artìstica de Sebastiano Pilosu (coautore cun Davide Melis). Realizada dae Karel film production & communication, cun su contributu de sa Regione Autònoma de sa Sardigna e s’amparu de Sardegna Film Commission, sa sèrie est cumposta dae ses puntadas de 50 minutos ognuna:
Ballare: Analizat su cantu a boghe ‘e ballu comente acumpangiamentu modernu pro su ballu, apretziadu meda dae sos giòvanos pro ameddare e istare in paris.
Ammorare: Afrontat su tema de s’amore in su cantu, indaghende sos testos poèticos intregados a sa fèmina istimada o a s’amore, leende a cunsideru finas sos cantos a sas amoradas de Otzana e su cantu a sos isposos novos de Orgòsolo pro sa Candelària.
Pregare: Tratat mescamente de gosos e de cantos litùrgicos e paralitùrgicos de Chida Santa, imbestighende s’elementu rituale e religiosu de su cantu a tenore.
Poetare: Chistionat de su cantu a tenore comente trastu pro espressare sa poesia a taulinu e a bolu, pro mèdiu de sas garas logudoresas e sas cantadas campidanesas a bàsciu e a contra, e cun addòbios improvisados in versos.
Emigrare: Cumpudat su cantu a tenore foras de Sardigna: tra su disterru de sos sardos in su mundu e sos invitos a cantare pro sos tenores in Itàlia e in s’istràngiu, su cantu de sos disterrados e su de sos de àteras natzionalidades.
Cumpartzire: Allegat de sas contaminatziones musicales in su cantu a tenore, dae s’influèntzia de artistas comente a Peter Gabriel a collaboratziones cun mùsicos che a Marcello Melis cun su Tenore de Orgòsolo, finas a sos progetos prus a friscu de su tenore de Orosei.
S’òpera si proponet de contare su mundu de su cantu a tenore pro mèdiu de sas boghes de sos protagonistas etotu, indaghende e chirchende de cumprèndere su significu chi su cantu tenet pro ognunu de issos. Su tìtulu “A boghe leada,” chi inditat sa manera de intreverare sas boghes in sos càntigos a boghe ‘e ballu, divenit una metàfora pro inditare sos interventos, cando unu cando s’àteru, de sos protagonistas e de sos argumentos in intro sa sèrie. Est sa pluralidade de sas boghes a cumpònnere su contu e su sentidu suo, introduende s’ispetadore in su mundu de su càntigu a tenore cun significados, funtziones e cuntestos diferentes.
Custu est s’acàpiu pro bìdere sa sèrie:
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
