Presentadas in anteprima unas cantas imàgines de su progetu virtuale chi torrat a donare vida a sas ruinas de su situ de Pani Loriga de Santadi.
S’antighidade torrat a nàschere gràtzias a sa ricostrutzione virtuale: unu progetu innovativu amparadu dae sa Regione Sardigna (Progetu “SanSiMu_Cultural Access” – Culture LAB POR FESR SARDEGNA 2014-2020).
Indagare su passadu pro connòschere sa vida de ogna die de sos antepassados nostros pro mèdiu de sas testimonias archeològicas, est sa punna de ogni bisitadore. Oe, totu custu est fintzas prus fàtzile cun s’impreu de sas tecnologias noas chi donant un’oportunidade rivolutzionària pro megiorare s’esperièntzia de sa bìsita. Sa ricostrutzione virtuale est sa tècnica chi prus de totus permitit de ammustrare comente fiant sos giassos archeològicos in sa forma originària issoro.
In su situ de Pani Loriga, su progetu de ricostrutzione virtuale in s’Àrea A de est devènnidu realidade gràtzias a s’agiudu de sa Regione Sardigna, in collaboratzione cun su Comunu de Santadi e sa Subrintendèntzia SABAP. Custa initziativa promitet de ofèrrere una mirada noa subra de sa vida in s’edade pùnica, mudende e megiorende su modu pro connòschere su passadu nostru.
Su progetu (realizatzione tècnica de Teravista) est cumentzadu cun sa creatzione a sa minuda de unu modellu 3D de sas istruturas archeològicas, isfrutende tècnicas de ripresa fotogramètrica avantzadas cun drone. A pustis sas imàgines a risolutzione arta sunt istadas pinnigadas a pare pro realizare unu modellu tridimensionale detalliadu meda. Posca, s’assòtziu de cumpetèntzias tècnicas e archeològicas, cun s’impreu de sos datos essidos a pìgiu in sos iscavos, ant permìtidu de rapresentare su giassu in sa mannària originària sua, gràtzias a sa ricostrutzione virtuale.
Impreende visores 3D, sos bisitadores s’ant a pòdere imbèrghere in intro de su monumentu e caminare in sos caminos antigos de sa tzitade pùnica. Sa ricostrutzione at a èssere atzessìbile fintzas a traessu de sos sistemas multimediales de su Museu archeològicu, donende a sos bisitadores sa possibilidade de tènnere un’esperièntzia galu prus interessante e educativa.
Unas cantas imàgines de custu progetu ispantosu sunt istadas publicadas in sa pàgina Facebook de Sèmata Società Cooperativa, gestore de su situ de Pani Loriga.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
