De immoe in susu, de s’acorpamentu iscolàsticu prevìdiu dae su PNRR, si nd’ocupat su Ministèriu de s’Istrutzione. A pustis de sa mancada aprovatzione de su pranu regionale, su Cunsìgiu de is Ministros at detzìdidu su commissariamentu de sa Sardgina, intreghende s’incàrrigu a su diretore de s’Ufìtziu iscolàsticu regionale, Francesco Feliziani. Sa detzisione definitiva depet lòmpere intro su 27 de ghennàrgiu e previdet s’acorpamentu amministrativu de noe istitutos iscolàsticos.
Paris a sa Regione Sardigna su Ministèriu at commissariadu fintzas Toscana, Emìlia-Romagna e Ùmbria. Unu sèberu chi at allùidu su cunfrontu polìticu e istitutzionale.
Segundu su diretore de s’Ufìtziu iscolàsticu regionale Feliziani, su dimensionamentu non tocat s’oferta formativa, tratende·si de un’acorpamentu giurìdicu-amministrativu ebbia pro reduire su càrrigu burocràticu de is dirigentes iscolàsticos, ma sindacados, entes locales e Regione timent un’agràviu de is cunditziones giai dìligas de s’iscola sarda.
Giuseppe Corrias (Uil Scuola) e Emanuela Valurta (Flc Cgil Sardegna) ant naradu chi su provedimentu, diat pòdere indebilitare galu de prus de su sistema iscolàsticu regionale, giai suferente pro more de s’ispopulamentu, s’isperdìtziu iscolàsticu e is dificultades logìsticas. De sa matessi opinione fintzas de s’Anci Sardegna, cun sa presidenta Daniela Falconi chi at propostu una lege natzionale pro amparare s’istrutzione in is territòrios prus fràgiles.
A livellu natzionale, su ministru de s’Istrutzione Giuseppe Valditara, in un’intervista a su Corriere della Sera, at torradu a nàrrere chi ddoe tenet regiones chi sunt oponende·si pro idea ebbia, e chi su commissariamentu est pretzisu pro respetare is obietivos de su Pnrr. Sa Corte costitutzionale diat àere giai acraridu chi su dimensionamentu non cumportat sa serrada de is iscolas e nimencu dannos a su servìtziu iscolàsticu.
Is opositziones e is presidentes de is Regiones interessadas faeddant imbetzes de una fortzadura istitutzionale. Unu pro totus su presidente de s’Emìlia-Romagna Michele de Pascale, chi in la Repubblica at decraradu: «Non faghent a tènnere iscolas cun duamìgia istudiantes. S’autonomia iscolàstica est una conchista».
Sa Regione Sardigna torrat a nàrrere su suo no. S’assessora a sa Pùblica istrutzione Ilaria Portas sutalìniat comente in is ùrtimos tres annos sa regione apat bidu s’acorpamentu de 36 autonomias iscolàsticas. «S’ausèntzia de unu dirigente – ispiegat – diat causare unu dannu mannu a istitutos chi a s’ispissu gestint prus de deghe plessos ispainados in territòrios mannos».
In s’auditzione de gianteris in Palatzu Chigi, Ilaria Portas aiat postu a notu is problemas geogràficos e sotziales de s’Ìsula, caraterizada dae crisi demogràfica, dificultade de mobilidade e infrastruturas istradales e digitales malas.
Chesciosa meda fintzas sa presidente de sa Regione Alessandra Todde, chi at allegadu de su commissariamento comente de «un’àtera proa de s’assurdidade de custu Guvernu». De su matessi parre su presidente de su Cunsìgiu regionale Piero Comandini, chi pedit unu dimensionamentu diferentziadu e prus autonomia.
Como is paperis colat a is cummissàrios, mentras sa Regione valutat is atziones legales de printzipiare a pustis de su pronuntziamentu de su Cunsìgiu de Istadu. Su recursu abbarrat un’ipòtesi cuncreta.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
