“Beh, como nessi est finida sa sicagna!”. In medas diamus pòdere àere naradu custa frase a pustis de sas abbas pròidas in cistos meses e, mescamente, a pustis de sas àeras faladas cun Harry. Ma seguros semus chi custa frase no l’apamus narada tropu a lestru? Ca diat pàrrere su triunfu de sa pensada curtza, de una narratzione chi pigat pro dieta sana e medida un’indigestione.
“Beh, como s’ierru nessi l’est faghende!”. Bi semus torra. Sas isbarriadas de bentu chi sunt dende podda a fundos e coberturas lu diant pòdere cunfirmare. Ma seguros semus chi custu bentu non siat favoressende s’evotraspiratzione de unu terrinu chi s’abba si l’est lassende in su pìgiu suo a dae chi no est a tretu de nde suspire prus?
E como, pregontemus·nos·lu. Ite istiu at a fàghere? S’istiu de su 1315 cando sesseit su perìodu caente medievale in favore de una glatziatzionedda? Est dimanda chi cheret fata fintzas ca sos zeru grados de pagas iscutas in una localidade cubana los ant bogados in professone che chi esserent istados sa cunfirma santa de su negatzionismu. O at a fàgher eun’istiu sicu?
Non devent mancare in sas mesas de chie pigat sos disinnos sas chistiones abertas de sa gestione de s’abba (a cando un’interventu sistemàticu pro acontzare sas conduturas?). Ma non devet nemmancu mancare su restu: chi cumbinat cun su chi non diamus pòdere prus gestire pro more de unu tziclu de s’abba chi intrèverat fases prus chi non proinosas cun fases assutas in tempos e logos cuntzentrados.
Ca sos “medicane” chi amus a connòschere semper de prus naschent pròpiu dae unu potenziale enèrgetico de un’atmosfera àrrida chi mudat in eventu estremu prus de una perturbatzione. Ca si faghet totu paris su chi sobrat nche l’isperdimus in pare cun su chi nch’imbolamus…ispèrdidu dae s’abba.
Su clima est cambiende màrtzia, nois non podimus abarrare a folle.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
