Su disinnu de s’amministratzione Trump de impònnere dàtzios contra a su Cànada e a su Mèssicu est in su matessi tempus econòmicu, polìticu e geogràficu. E lu cumprendimus mègius si custa netzessidade de controllu maga-capitalìsticu, dae cussas fronteras, si nch’àrtziat finas a sa Groenlàndia e nche falat finas a su canale de Pànama.
Custa polìtica protetzionìstica no est però limitadas a su chirru nord de sas Amèricas. Sa punna de fàghere torra mannos sos Istados unidos nch’est in intro de una gherra cummertziale sena làcanas peri su mundu. In Sardigna, pro nàrrere, giai sunt carculende pèrdidas millionàrias pro more de custas medidas.
S’allarme l’at dadu sa Cia, non sa Central intelligence agency ma sa Cunfederatzione de is massajos italianos. E l’at dadu in ocasione de sa de deghe Cunferèntzias econòmicas suas. Sos datos illustrados pertocant s’istadu italianu intreu, sende chi s’export agroalimentare tricolore conca a sos Usa est crèschidu de su 158% in deghe annos.
Ma sa regione chi at sufrire de prus est sa nostra, in ue produimus prus de su 90% de su casu berbeghinu romanu Dop. Dae sa Cia narant chi bi cheret «un’atzione diplomàtica forte pro agatare una solutzione e non cumpromìtere sos traguardos lòmpidos finas a como».
Prus otimistas dae su Consòrtziu “Pecorino romano”. Narat su presidente Gianni Maoddi chi «oe su casu costat 12,20 èuros su chilu, su dòpiu cunforma a ses annos a como». Su riferimentu temporale est a su perìodu de sas protestas de is pastores.
A bisu de Maoddi, duncas, custos dàtzios diant pòdere èssere «abrandados mègius», mancari petzi a pustis (si non balet su deja-vu) amus a bìdere cale est sa cumponente chi at a sufrire de prus. Pro seguru is traballadores de is sartos.
Sa lògica est sa de diferentziare sas esportatziones, e in custu Maoddi narat chi «sos ùrtimos annos sunt crèschidos àteros mercados minimende sa dipendèntzia dae sos Usa, dae su 45 a su 35%». E chi duncas de mercados bi nd’at àteros. Ma diat èssere mègius fintzas a diferentziare sa produtzione.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
