Comente la diamus pòdere lèghere, inoghe in Sardigna, sa chistione de su riarmu europeu? Tres sunt sas ventanas de abèrrere pro proare a incuadrare sas cunsighèntzias de custu sèberu chi naschet a pustis de ruolu nou de sos Istados unidos.
Ma in antis de totu cheret chi faeddemus de custu riarmu, ca diat pòdere èssere chi non servat a una Nato noa cun base europea ma petzi a mantènnere sa Nato chi connoschimus rispetende sa rechestas de s’incuilinu nou de sa domo arba (chi, difatis, cheret chi sos paisos europeos bi pòngiant meda prus dinare).
Naradu custu comintzemus cun su chi, cun probabilidade manna at a acontèssere in terra nostra.
In contu de bases militares non b’at resone peruna (resone issoro) pro chi connoscamus una furriada: sa Sardigna portaèreos de su Mediterràneu fiat e portaèreos de su Mediterràneu at a abarrare. Non nch’at coladu tempus meda dae cando su ministru Crosetto at naradu chi «non si podet pensare a una ridutzione».
E l’aiat naradu rispondende a un’interrogatzione de sa deputada Francesca Ghirra. A bisu de Crosetto sa terra nostra est «pretziosa pro suportare atividades de annestru natzionales in unu cuntestu internatzionale de gravidade e cumplessidade nòdidas». E ite at a èssere como si tando fiat grave e cumplessa? Sos agetivos non nos mancant.
S’àtera ventana pertocat sa rapresentàntzia. Si est dae su 2014 chi votamus cun una lege eletorale chi nche giàgarat sas opositziones a sos partidos de s’intrèveru, de s’alternàntzia, pro ite como, cun semper prus dinare de nde bogare a s’istadu sotziale, sas assembleas eletivas diant dèvere èssere prus rapresentativas? E custu balet a totu sos livellos. Ismentighemus·nos duncas proportzionales e garantzias pro sas minorias.
S’ùrtima chistione si riferit a sa transitzione energètica. Cada sèberu birde – ispeculatzione a banda – fiat giustificadu cun tzifras e pertzentuales de decarbonizatzione. Est craru chi sa grandu capatzidade energìvora de s’indùstria bèllica e sa produtzione de C02 in crèschida nos at a pònnere a meledare: a is chi ant crèidu a s’Europa green e a is chi non cheriant sa vetura elètrica.
Como de green (de green mimèticu) nos ant a intregare sos carrarmados. E prus de sos chi amus connotu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
