In Casteddu sa publitzidade si podet furriare a discussione istòrica. Est su chi est acontessende in custas dies in pratza Yenne in ocasione de s’arribu a Sardigna de Ikea. A pustis de sa campagna de su colossu isvedesu de s’arredamentu, s’Assemblea Natzionale Sarda (Ans) at detzisu de rispòndere cun unu aparitzamentu irònicu ma de grandu de significu polìticu e simbòlicu.
Sa campagna pro s’aberidura de una butega noa de Ikea in Su Masu, prevìdida pro su 19 de martzu, at tentu comente protagonista unu de is sìmbulos prus connotos de Casteddu, s’istàtua ecuestre de Carlo Felice. Su monumentu in brunzu de s’iscultore Andrea Galassi, dd’aiant collocadu in su 1860 pro onorare su re sabàudu chi aiat inghitzadu is traballos pro su caminu chi aunit Casteddu a Portu Turre (sa “Carlo Felice”, est a nàrrere sa SS 131). Su soberanu piemontesu est rapresentadu cun su bratzu tèndidu chi però inditat una diretzione “isbagliada”. S’azienda de mobìlia at basadu sa propaganda promotzionale cosa sua isfrutende custu echivocu istòricu, ponende bator istàtuas cun sa famada bussa bleu in is fentanas de s’Hotel Carlo Felice cun a suta s’iscrita: «Hej, guarda che Ikea è per di qua».
Deretu però est lòmpida sa risposta de s’Assemblea Natzionale Sarda. S’assòtziu, impegnadu dae annos in sa valorizatzione de sa cultura, de sa limba e de s’istòria de Sardigna, at profitadu de custa s’initziativa publitzitària pro torrare a allegare de una pàgina importante de s’istòria sarda.
In unu palàtziu de Pratza Yenne etotu, difatis, s’Ans at collocadu unu cartellu chi narat: “Ikea, ti sbagli! La direzione giusta per cacciare Carlo Felice è quella. Bivat sa Sarda Rivolutzione”. Sa fritza però est puntada conca a portu.
In su comunicadu cosa sua, s’assòtziu ispiegat ca «Carlo Felice est una de is figuras prus controversas de s’istòria nostra. Pro custu sugerimus in manera simbòlica sa bia giusta: sa de su mare».
Su riferimentu est a unu de is fatos prus importantes de s’istòria sarda. Su 28 de abrile 1794, Sa Die de s’aciapa, is casteddajos si fiant rebellados a su podere piemontesu, e nche aiait bogadu dae sa tzitade su vitzerè e sa corte sua. Cuss’episòdiu aiant dadu inghitzu a sa temporada polìtica connota comente Sarda Rivolutzione, unu movimentu chi poniat in discussione su sistema feudale e su domìniu piemontesu in s’ìsula.
Non pro nudda in su cartellu de risposta de Ans a inditare sa filada giusta est sa figura de Giuanne Maria Angioy, protagonista de cussu movimentu rivolutzionàriu, sìmbulu de sa luta contra sa tirrannia de su sistema feudale.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
