Torrare a traballu. A pustis de unu mese dae sa serrada de is atividades econòmicas pro more de su coronavirus, sa crisi in Sardigna est giai cumentzada e cun su tempus arriscat de èssere prus lègia. Tando s’est cumentzande a faeddare de unu modu pro torrare a istantargiare s’economia chi non nogat a sa salude de sa gente.
Su partidu indipendentista Progres in unu comunicadu de imprenta at propostu de torrare a abèrrere is atividades in cussos territòrios sena casos de virus: biddas prus piticas in ue bìvent prus pagu de milli abitantes e a largu dae is àteras. Si pensat prus che totu a cussas butegas chi tenent caraterìsticas pro no fàghere atobiare una cantidade manna de gente.
A su matessi tempus is indipendentistas pedint de mantènnere s’isulamentu de is categorias prus a arriscu: is personas chi tenent prus de 65 annos e cussas chi sufrint de calicuna maladia.”In Malta, in ue tenent una densidade abitativa binti bortas majore de cussa sarda, ant fatu aici”, si podet lèghere in su comunicadu.
Infogràfica publicada dae Progres
Segundu Progres difatis sa peculiaridade de sa terra nostra diat dèpere èssere una risursa, cun sa punna de donare balore a su mercadu internu: “In Sardigna esistent prus de 120 comunas suta is milli residentes, totu comunidades in ue si diat pòdere pensare de torrare a abèrrere is normales fainas, limitende is cuntatos cun is biddas acantu s’agatant galu casos de contàgiu. Subra 377 comunos, a su 13 de abrile, 262 (su 69%) no aiant galu registradu unu contàgiu, e su 91% teniant unu totale de contagiados inferiore a chimbe persones”.
S’idea, acumpangiada dae datos epidemiològicos de sa Protetzione Tzivile, non tenet in cunsideru però chi in custu momentu su chi ischimus de su coronavirus est pagu a beru: in Itàlia ant istimadu chi is contàgios diant podere èssere deghe bortas prus artos de cussos averiguados. Tando est possìbile chi in Sardigna puru nche siant personas contagiadas cuadas dae is nùmeros ufitziales. In su pròpiu modu Caminera Noa, un’àteru movimentu indipendentista, at propostu de fàghere controllos gratùitos a totu is sardos: “Si podet fàghere cun su dinari de su ministeru de sa Salude e cun su dinari destinadu a su Mater Olbia e a is àteras clìnicas privadas” , at naradu Caminera Noa. L.M.
