Sa bidda de Bànari est pronta pro un’editzione noa de sa festa de sa chibudda indeorada. S’apuntamentu in sa bidda de su Meilogu est pro sàbadu su 20 e pro domìniga su 21 de custu mese, trìulas.
Manna, nuscosa, cun unu pesu chi nch’est intre sos 400 grammos e su chilu e mesu, indeorada in foras e cun pìgios in colore de avòriu in intro, sa reina est issa, collida in custos tempos a pustis de unu tziclu annuale de traballu. A concruos de austu si ponet s’argiola cun sos sèmenes otènnidos dae sa produtzione de s’annu in antis. Sas prantas creschent in cue pro 60 dies, abbadas su tantu issoro in sa terra contzimada a ledàmene cumpridu. Su mese de santandria a sas prantàrgia li dant dimora noa ponende·nche·la in su terrinu in antis lauradu e fresadu. dae tando finas a trìulas sa passèntzia e s’aficu de chie las at postas faghet su restu finas a cando issa no est pronta.
S’initziativa in onore suo – in intro de su tzircùitu Salude&Trigu de sa Càmera de cummèrtziu de Tàtari – est organizada dae sa Pro Loco in collaboratzione cun su Comune de Bànari cun su patrotzìniu de sa Regione.
Su programma est bastante ricu cun sas Pro Loco de su territòriu chi ant a aprontare màndigos diferentes a base de chibudda e àteros pratos (sa de Ùsini sos aperitivos, sas de Bànari e de Uri sos primos, sas de Tiesi de portu Turre e de Biddanoa Monteleone sos segundos, s’oberaia banaresa de Santu Larentu sos durches). De prus, ant a ondrare sa festa sas essidas peri sos sartos de sa bidda a pee e in mountain bike, sos laboratòrios culinàrios, sas presentada de libros e sas dibatas in contu de massaria e de economia de su logu.
E si s’annu coladu su premiadu fiat su tenore Francesco Demuro, ocannu at a tocare a Gianfranco Zola a retirare su prèmiu de sa chibudda. Su giogadore ulianesu (Nuorese, Torres, Napoli, Parma, Chelsea e Cagliari) at retzire s’òpera aprontada dae s’artista Giuseppe Carta. Su programma intreu in https://www.sagracipollabanari.it/
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
