Unu biàgiu nou intre misteru, delitos orrorosos e ambientatziones misteriosas pro Dylan Dog. In mese de ladàmine arribat in edìcola “L’ultimo treno della notte”, su nùmeru 482 de sa sèrie famada, cun s’iscenegiadura firmada dae su regista e autore tortoliesu Mauro Aragoni e is disinnos de Corrado Roi.
Sa protagonista de sa vicenda est Julia, giornalista de crònaca niedda de su Night Post, galu in chirca de is mortores de is nonnois suos. Unu delitu abarradu sena corpèvoles, cun meda suspetos e preguntas: Julia, difatis, est cunvinta chi a palas de cussa tragèdia si podet cuare calicuna cosa chi no pertocat sa dimensione umana ebbia.
Cando una sèrie noa de omitzìdios paret chi fatzant torrare a campu unos cantos elementos ligados a su misteru de su passadu, sa giornalista pedit agiudu a Dylan Dog. Pro s’investigadore cumentzat gasi un’inghesta chi ddu giughet a iscobèrrere un’assassinu seriale e, prus che totu, e ite s’atacat a palas de una filera longa de ochisuras.
Pro cuncordare s’istòria, Aragoni s’est ispiradu fintzas a unu fatu reale. S’autore at contadu de àere pigadu ispiratzione dae un’acontessimentu de unu assassinu seriale esìstidu a beru chi pigaiat su trenu pro ochiere is vìtimas suas in logos diferentes, a manera chi esseret prus difìtzile collegare intre issos is diferentes delitos e sighire una pista.
Pro su regista sardu est un’àtera esperièntzia noa cun s’universu de Dylan Dog. In su 2024 aiat giai firmadu “L’oscuro messaggero”, publicadu dae sa Sergio Bonelli Editore. In su percursu ddoe est fintzas su curtumetràgiu Nuraghes e sa sèrie internatzionale That Dirty Black Bag.
Aragoni at contadu de àere dedicadu meses de traballu a custa iscenegiadura noa e de èssere acapiadu meda a custu progetu. Un’emotzione ispètziale est istada, a pustis, sa de bìdere s’istòria pigare forma gràtzias a su lapis de Corrado Roi, unu de is artistas prus rapresentativos de su fumetu italianu.
In is paràulas de s’autore non mancat su ringratziamentu a Barbara Baraldi, curadora de sa sèrie, e a su grupu editoriale chi at acumpangiadu sa realizatzione de su fumetu, cun unu pensamentu fintzas pro Tiziano Sclavi, su creadore de Dylan Dog.
Sa cobertina de “L’ultimo treno della notte” est de Raul Cestaro e Gianluca Cestaro
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
