In s’assemblea de metade annu chi sa Consulta Intercomunale de su Gadduresu at fatu sas dies coladas in Tèmpiu, nd’at essidu a campu una proposta noa pro sa valorizatzione de su patrimòniu linguìsticu territoriale. Ghiadu dae Caterina Vittoria Roselli, s’organismu at aprovadu unu pianu de atzione istruturadu cun tres pilastros fundamentales chi punnant a pònnere paris sa chirca acadèmica, sos contos orales e s’innovatzione tecnològica.
Su primu interventu pertocat una chirca sotziolinguìstica de fàghere intre su mese de cabudanni de ocannu e su de nadale de annoas. Dirìgidu dae Marina Branca de s’Universidade de Còrsica “Pasquale Paoli” e dae Riccardo Mura de s’Universidade de Tàtari, s’istùdiu at a pònnere in parte unu campione de 278 istudiantes de sas iscolas segundàrias de primu gradu de sa Gaddura. S’obietivu est su de mesurare s’istadu de salude de su gadduresu, analizende·nde sa trasmissione intre sas generatziones, valutende sas cumpetèntzias reales de sos prus giòvanos e osservende s’acostamentu de sos pitzocos cara a sas variantes locales.
In su matessi tempus, su progetu “No la sapia!” at a mòvere dae sa memòria istòrica e dae sa regorta de sas boghes de sos testimòngios prus mannos. Pro mèdiu de atividades laboratoriales in sos Comunes aderentes si cheret fàghere un’archìviu cun materiales àudio e vìdeo pro dare amparu a su lèssicu e a sas memòrias de su tempus coladu. Custu patrimòniu at a èssere sa base pro sa realizatzione de unos cantos podcast pro torrare a chie ascurtat sos sonos de sas variedades diferentes faeddadas in su logu.
In fines, sa Consulta cheret afortiare sa presèntzia digitale de sa limba gadduresa gràtzias a una collaboratzione istratègica cun Sardware e cun su grupu Tradutziones de s’Assemblea Natzionale Sarda. Su pianu previdet s’isvilupu de una pàgina dèghida in Wikimedia Incubator comente parte de unu caminu conca a un’editzione autònoma de Wikipedia in limba gadduresa. Pro custu traballu ant a impreare s’istandard ortogràficu, aprovadu dae sa Regione Sardigna duos annos a como, cun sessiones mensiles de formatzione online e abertas a sa partetzipatzione de totu sos interessados.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
