Casi 34milla impresas artigianas registradas: sa Sardigna est a su de duus postus natzionalis po pertzentuali de crèscida. Funt is datus de s’Ufìciu Stùdius de Confartigianato Imprese Sardegna.
Su setori at registrau 33.935 realtadis, aundi 33.716 funt ativas, rapresentendi prus de su 20% de totu is impresas sardas. Nùmerus chi amustrant una crèscida de su 0,68%, contras a su +0,63 de s’annu passau. Su saldu est de +230 impresas, cun 639 oberturas e 409 serradas.
«Sa crèscida registrada de is impresas artigianas sardas rapresentat sa cunfirma de su traballu fatu de is imprendidoris impari cun sa Regioni po sa valoritzatzioni de su cumpartu – narat Giacomo Meloni, presidente de Confartigianato Imprese Sardegna – arresultau de unu cunfrontu cun is assessoraus chi at permissu de torrai a finantzai in is annus sa Lei 949, chi at postu a disponimentu 120 milliones de èurus distribuìus a su cumpartu».
Is prus de 80 milla traballadoris chi faint parti de is realtadis artigianas rapresentant prus de su 20% de su nùmeru totale de is ocupaus in su territòriu. In particulari, traballant in s’artesania sarda su 42,2% de is traballadoris de sa manifatura, su 57,2% de is traballadoris de is costrutzionis e s’11,8% de is traballadoris de is servìtzius.
A livellu de territòriu andat beni sa provìncia de Casteddu cun 12.415 impresas artigianas registradas, cun una crèscida de su 0,73% e unu saldu de +90 unidadis donau de is 247 iscritzionis e de is 157 serradas. A su de duus postus sa provìncia de Tàtari-Gallura cun 12.367 impresas artigianas registradas, cun unu tassu de crèscida de su 0,99% e unu saldu de +121 impresas, donau de is 254 oberturas e 133 serradas.
A su de tres postus Nùgoro cun 6.810 impresas artigianas registradas e cun una crèscida de su +0,27% donada de is 104 oberturas e 86 serradas. Prus modesta sa crèscida in Aristanis chi at registrau unu +0,04%, cun 2.343 impresas artigianas in totu, cun d-unu saldu de +1 dèpiu a is 34 oberturas e 33 serradas.
«No podeus ignorai comenti in is ùrtimus dexi annus su cumpartu apat passau una fasi particularmenti cumplicada – concluit Meloni – in totu custu tempus seus abarraus a costau de is imprenditoris chi creant traballu, produint valori agiuntu e sighint a investiri in su territòriu».
