Tennis in Casteddu, sunt incumentzados is campionados de segunda categoria maschile Est sa prima borta chi sos Assolutos de Segunda s'acumprint in Sardigna

De su merie de su 15 de su mese de cabudanni in sos campos de su Tennis tzìrculu Casteddu partint sos campionados italianos de sa Segunda categoria maschile de tennis. Sa manifestatzione, organizada dae su tzìrculu de Monte Urpinu, at a andare a in antis finas a domìniga 23 e at a assignare s’iscudetu de Segunda in su torneu de singulare e in su dòpiu.

Est sa prima borta chi sos Assolutos de Segunda, chi rapresentant su torneu de tennis prus importante in Itàlia cun sos giogadores italianos protagonistas, s’acumprint in Sardigna. Su Tc Casteddu torrat a acasagiare unu eventu mannu chimbe annos a pustis de sa finale gloriosa de Fed Cup cun s’Itàlia protagonista gràtzias a sa Federtennis e a su presidente Angelu Binaghi chi at reconnotu a s’istòricu tzìrculu casteddaju ghiadu dae su presidente Giusepe Macciotta custa oportunidade.

De oe at a èssere, tando, noe dies de tennis de livellu artu. In sos campos in terra ruja de Monte Urpinu ant a falare sos tennistas prus fortes bènnidos de totu Itàlia, comente a Gianluca Nare (ex nùmeru 175 de su mundu), Mateo Fago e Omar Giacalone (ambos a inghìriu a sa de 400 positzione Atp). Sunt 141 sos giogadores chi s’ant a dare batalla pro proare a conchistare s’Iscudetu: 137 tennistas de sa Segunda categoria, prus 4 chi su coladu trìulas ant conchistadu a Cuartu Sant’Aleni sas semifinales a sos campionados italianos de sa de tres categorias e chi, pro regulamentu, sunt ammìtidos a chertare pro sos campionados de Seconda. Tra custos b’ant fintzas duos sardos, Istèvene Zedda (Sporting tzìrculu Cuartu) e Albertu Caravati (Tc Casteddu).

Sa grupu de sos sardos est assentadu dae deghessete tennistas, tra issos s’ex campione Assolutu sardu Ginu Asara (classìfica 2.6, Torres Bozzo), su giòvanu Alessandru Biscardini (classìfica 2.5, Oru Ruju), e Micheli Fois (classìfica 2.4, Tc S’Alighera).

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.