Chimbe pellìculas in limba sarda a sa rassegna ‘Evò ce Esù’ dedicada a sas limbas minoritàrias. Cras 16 de cabudanni in Martignano, su burgu prus piticu de sa Grecìa Salentina, torrat sa rassigna tzinematogràfica ‘Evò ce Esù’, s’ùnica in Pùglia chi tratat de su tzìnema in sas limbas de minoria.
S’initziativa naschet dae un’idea de sa cooperativa sotziale de su Parcu turìsticu culturale Palmieri de Martignano, in collaboratzione cun su Comunu de Martignano, sa Cineteca Sarda e su Babel Film Fèstival de Casteddu (cun sos assòtzios Babel, Terra de Punt e Àrea Visuale Film).
At a èssere una rassigna rica e rapresentativa de su tzìnema subra de sas minorias linguìsticas. Tres dies de film, documentàrios, longumetràgios e pellìculas curtzas de animatzione. Pro su Babel film fèstival de Casteddu e su prèmiu Kentzeboghes at a èssere presente su regista e co-diretore Paolo Carboni.
Una setzione de sa rassigna at a èssere dedicada a su tzìnema sardu, rapresentadu dae sas duas pellìculas binchidoras de s’editzione 2020 de su prèmiu Kentzeboghes: ‘Santamaria’ de su regista Andrea Deidda contat s’istòria de unu giòvanu de Seui chi movet a Casteddu pro sìghire su bisu de devènnere unu grandu pùgili ; ‘12 Aprile’ de Antonello Deidda est unu biàgiu a sas làcanas de sa realidade tra sa tzitade de Casteddu chi festat s’Iscudetu de su 1970 e sa de su 2020 serrada dae su cunfinamentu pro more de su virus Corona.
In Martignano ant a èssere projetados ‘Male Fadau’ de Matteo Incollu, ‘Mira sa dì’ de Andrea Cannas, ambos binchidores de su Babel Film Fèstival 2021, e ‘Issa’ de Stefano Cau.
Su film giradu dae Matteo Incollu est ambientadu in Baunei in su 1942. ‘Male Fadàu’ est Padoreddu, su macu de sa bidda. Una note furat unu ràdiu dae un’aparèchiu de gherra tedescu, rùidu tra sos montes. ‘Mira sa Dì’ benit dae un’istòria capitada a beru in Mòguru in su 1930 cando in sa bidda guvernaiat su fascismu creende murrunzos e tribulia tra sos abitantes. In ‘Issa’, de Stefano Cau, una bidda pitica isulada in sos sartos est morende pro ite dae annos non naschent prus pipios. Est unu contu de un’ùrtimu tentativu de una bidda pantasma de s’arrèndere a su spopolamentu.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
