A una fèmina gràida de casi oto meses, detènnida in sa setzione feminile de su càrtzere de Casteddu-Uda, in custas dies coladas, dd’ant trasferida a sa Comunidade terapèutica Emmaus de Igrèsias, acanta at a colare is ùrtimas chidas in antis de isgraidare.
Sa detzisione, disposta dae su giùighe, est lòmpida gràtzias a unu coordinamentu istitutzionale cunsideradu “determinante”: Diretzione penitentziària, àrea sanitària e àrea seguridade de s’Istitutu, repartu de Ginecologia de su Policlìnicu Universitàriu, Garante regionale de is persones privadas de sa libertade e responsàbile de sa Comunidade Emmaus.
Dd’at fatu a ischire Maria Grazia Caligaris, presidenta de s’assòtziu “Sotzialismu Deretos Riformas”, chi aiat acumpangiadu sa giòvana a su Policlìnicu pro una bìsita de controllu.
Caligaris at nadu de èssere satisfada meda pro custa solutzione, ma mancari gasi at torradu a denuntziare is crititzidades istruturales chi pertocant sa presèntzia de fèminas impedidas o cun fìgios piticos in is istitutos de pena. “Sa detentzione de una fèmina in càrrigu agenu o de una mama cun fìgios – at iscritu in unu messàgiu publicadu in sa pàgina sotziale de Socialismo Diritti Riforme – est una birgòngia siat suta su profilu èticu, ca ponet in perìgulu sa vida de su pipiu, siat pro su discumbèniu causadu a totu istrutura cartzerària. In is casos de subrafollamentu e in mancàntzia de unu tzentru clìnicu in sa setzione feminile, sa solutzione est su trasferimentu in ospidale pro cada netzessidade, cun sa posta in mòvida contina de ambulàntzias e agentes penitentziàrias”.
Segundu sa presidenta de SDR, su càrtzere non podet garantire un’ambiente adeguadu in gravidàntzia e in is primos meses de vida de is pipios. “Su inserru non deghet a is mamas chi sunt pro fàghere partu e nimacu a is paanas: màndigu e àera bona, mudìmene e seguridade emotiva sunt fundamentales in custos perìodos, ca is creaturas in brente o deretas de nàschere benit cunditzionadas dae totu su chi ddas inghìriat”.
Un’àtera chistione de non trascurare, ammentat Caligaris, est s’ausèntzia in Sardigna de un’Icam (Istitutu a Custodia Atenuada pro Mamas Detènnidas), unu modellu giai ativu in àteras regiones italianas chi permitit a is fèminas sutapostas a mesuras cautelares o penas detentivas de bìvere in un’ambiente amparadu paris cun is fìgios issoro, sena s’impatu traumàticu de su càrtzere. “Sa mancàntzia de custas istruturas – at agiuntu Caligaris – òbrigat sa magistradura a agatare rimèdios de apretu, cun s’arriscu de istesiare is mamas dae is fìgios e dae is familiares, cando imbetzes is pipios non tenent peruna neghe e no diat dèpere tènnere cunsighèntzias”.
Pro more de totu custas cosas, s’assòtziu pedit a is amministratziones locales e regionales de pigare provedimentos lestros pro predispònnere logos adatos a is mamas cartetzaradas, mancari siat pagas.
“S’isperu – concruit Caligaris – est chi custu fatu potzat devènnere unu modellu positivu de collaboratzione, pro chi non si repitat e pro chi cada fèmina gràida o cun pipios minoreddos agatet unu logu dignu e seguru acata colare su percursu giuditziàriu suo”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
