Su 24 de martzu, in Dèsulu s’at a tzelebrare una de is manifestatziones religiosas prus ispantosas de Sardigna, sa “Domìniga de Pramma“, ammaniada dae su Comunu, sa Pro Loco e sa Parròchia de S. Antoni Abate. Pro s’ocasione s’at a inchingiare finas su primu “Fèstival de Traditziones, Mùsica e Cantu Sacru in monte“, un’eventu dedicadu a sa tzelebratzione de sa Professone de is Parmas, acanta is Priorissas ant a essire cun is bestires antigos de sa festa e ant a portare in manos is parmas intritzidas.
Chèntinas de fèminas mudadas cun costùmene traditzionale s’ant a addobiare, in isetu de s’intrada simòlica de su Sennore a Gerusalemme.
A is 10.00 de mangianu, is Priorissas s’ant a riunire acanta sa crèsia de su Su Càrmine, in su bighinadu de Ovolàcio, pro sa beneditzione de is parmas, e a pustis at a cumentzare sa professone cara a sa crèsia parrochiale de Sant’Antoni Abate, in Issiria.
Totu sa bidda, belle totus bestidos cun is bestimentas traditzionales, s’at a unire a su corteu pro partetzipare a sa missa, tzelebrada dae Don Marco Floris.
In prus de sa professone, ddoe at a èssere sa possibilidade de bisitare sa mustra “I Cimeli della devozione“, contivigiada dae s’architetu Luca Nonnis, e sa mustra fotogràfica “Le Prioresse e la Settimana Santa“, curada dae Flavio Littera.
Pro s’ocasione sa Pro Loco de Dèsulu, ghiada dae Alessadra Peddio, at a presentare sa loteria pro sa regorta de fundos pro su restàuru de sa crèsia betza de Sant’Antoni e sa premiatzione de su primu Cuncursu Regionale de Fotografia, cun su tema: “Desulo: speranze, bisogni, prospettive”.
Seguru ocannu s’at a intèndere sa mancàtzia de tzia Caicca Garau, bènnida a mancare sa chida colada a 91 annos, mastra de pannu chi at semper postu su bestire traditzionale desulesu finas a ùrtimu.
Cun sa pèrdida de tzia Caicca, Dèsulu at pèrdidu unu cantu importante de s’istòria sua, ma is cunsìgios suos ant a abarrare comente inditos pro is giòvanos e in sa memòria de sa comunidade.
S’eventu at a èssere presentadu dae Giuliano Marongiu e trasmìtidu in direta dae Videolina.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
