In Sardigna nche tenent unu logu ispetziale nou de amparare e de ammirare. Cun su decretu de su 26 de martzu 2026, difatis, sa Regione at declaradu S’Arcu ‘e su Cuaddu, in sartu de Seulu, unu monumentu naturale.
Est una noa de importu mannu, ca custu logu est unu de is prus bellos e ispantosos de su tzentru Sardigna, ricu de natura, istòria e misteru.
Su monumentu est formadu dae rocas mannas istuvidas dae su tempus. Medas annos a oe, in custu tretu colaiat s’abba de unu riu antigu e fiat logu de paule. In is sèculos, su terrinu s’est pesadu e su bentu at traballadu sa pedra creende formas curiosas e dèchidas, casi comente chi esserent istadas pintadas dae sa natura.
Ma s’Arcu ‘e su Cuaddu no est importante pro sa bellesa sua ebbia. Suta de una roca manna chi paret un’arcu naturale s’agatat una domus de janas, est a nàrrere una pitica tumba istuvida in sa pedra dae is òmines de sa preistòria in su perìodu de su Neolìticu. Is istudiosos pensant ca custu logu esseret impreadu fintzas pro ritos antigos e momentos ispetziales de sa vida comunitària. Su giassu s’agatat in una zona connota e istimada meda dae chie faghet passigiadas in sa natura. Medas àndalas, difatis, andant cara a Sa Stiddiosa e cara a su riu Frumendosa, logos perfetos pro is escursiones e essidas naturalìsticas.
Pro amparare custu iscusòrgiu, sa Ras at istituidu un’àrea de respetu de 14,42 ètaros cun règulas pretzisas chi totus depent tènnere a pòmpiu. Non faghent a abèrrere àndalas noas sena permissu, non faghent a prantare craos o imperartos subra de is rocas, non faghent a regòllere fòssiles e tocat a rispetare matas e animales. S’incàrrigu de custoire e avalorare su monumentu sa Regione dd’at donadu a su Comunu de Seulu, chi at a dèpere fintzas collocare cartellos informativos pro agiuare is bisitadores a connòschere e respetare su logu.
A ogna contu in custu situ si podent acumprire fainas importantes comente sa chirca iscientìfica, s’istùdiu de s’ambiente, is bìsitas ghiadas e is atividades educativas pro pipios e pitzocos.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
