Est coladu unu sèculu dae sa trasmissione de is primos palinsestos radiofònicos, unu momentu chi at marcadu su cumintzu de un’aventura istraordinària in su mundu de sa comunicatzione. Pro ammentare su tzentenàriu de sa nàschida de sa ràdiu universitària, s’Universidade de sos Istùdios de Casteddu, in collaboratzione cun Confindustria Radio Televisione (CRTV), at ammaniadu un’eventu istraordinàriu a tìtulu: “Evento: 100 anni e sentirli. Passato, presente e futuro della radio”.
S’addòbiu est pro lunis su 20 de maju, dae sas oras 9.30, in s’àula Magna Mario Carta de sa facultade de Ingenieria, in bia de Marengo 2. Custu eventu at a èssere un’oportunidade ùnica pro contivigiare s’istòria, sos disafios atuales e sas prospetivas benidoras de sa ràdiu, unu mèdiu chi, nointames s’antighidade sua, sighit a èssere moderna, adatende·si de continu a sos tempos.
Sa die ant a èssere compudados sos limbàgios noos e sas formas noas de comunicatzione radiofònica, su ruolu semper prus influente chi sa ràdiu tenet in su panorama mediàticu de oe. Ant a èssere esploradas fintzas sas tecnologias noas chi sunt mudende su modu chi sa ràdiu lompet a su pùblicu prus giòvanu e dinàmicu.
Intre sas personalidades presentes b’ant a èssere sos editores e sas editoras de emitentes radiofònicas locales e natzionales, chi ant a tènnere s’oportunidade de chistionare cun sos istudiantes de s’Universidade. De prus, ant a partetzipare Dj Ringo, diretore artìsticu e presentadore de Virgin Radio, Francesco Abate e Paola Pilia, presentadora de Radiolina, e Luca Piras e Luca Scanu de Unica Radio.
Sa die s’at a concruire cun un’interventu de s’atoressa, presentadora televisiva e radiofònica Geppi Cucciari. A moderare s’eventu at a èssere sa giornalista Egidiangela Sechi.
Segundu Francesco Mola, Magnìficu Retore de s’Universidade de sos Istùdios de Casteddu, “Sa ràdiu at dimustradu de èssere unu mèdiu sena tempus, capassu de s’adatare a sos cambiamentos sotziales, giurìdicos e tecnològicos de sos ùrtimos 100 annos. Custu eventu nos dat s’oportunidade de riflètere in contu de custa evolutzione paris cun sos professionistas de su setore, afortiende su ruolu de s’universidade nostra in su territòriu e aberende ghennas noas pro interessare sa comunidade acadèmica manna nostra e àteros puru”.
–
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
