Unu situ de novas realizadu fatu cun s’Intelligèntzia Artifitziale ebbia est ponende in abolotu su mundu de su giornalismu italianu. Si tratat de we-news.com, una plataforma chi si presentat comente una testada de informatzione in tempus reale, ma acanta totu is artìculos sunt iscritos dae sistemas de IA, sena sa collaboratzione de giornalistas professionales.
In contu a sa chistione est intervènnidu su sutasegretàriu a sa presidèntzia de su Consìgiu de is Ministros cun delega a s’informatzione e a s’editoria, Alberto Barachini. Su sutasegretàriu at fatu ischire chi, a pustis de sa relatzione annuale de s’Autoridade pro is Garàntzias in is Comunicatziones (Agcom), a su presidente de s’Autoridade, Giacomo Lasorella est lòmpida una sinnalatzione formale.
Barachini at postu a notu comente su situ si presentat che una normale testada giornalìstica chi tratat argumentus de polìtica, crònaca, economia, salude e àteros temas de atualidade. Custu mancari is càbidos sunt elaborados dae s’Intelligèntzia Artifitziale e sena s’interventu de giornalistas in purpa e ossu. Finas su diretore inditadu in su situ, segundu is averiguamentos fatos, non resurtat iscritu a s’òrdine.
Segundu su rapresentante de su Guvernu, una situatzione de che a custa podet rapresentare unu perìgulu pro sa calidade de s’informatzione e, massimamente, pro su bonu funtzionamentu de sa vida democràtica.
A custa chistione est donende cara fintzas sa Federatzione Natzionale de s’Imprenta Italiana (Fnsi) e su Sindacadu de is Giornalistas de su Trentinu, chi ant presentadu un’espostu a s’AGCOM. Pro is duas organizatziones, sotziedades istràngias podent impreare sa tecnologia pro ocupare s’ispàtziu digitale e ispainare una pseudo-informatzione sena is garantzias de averiguamentu, responsabilidade e deontologia chi caraterizant sa professione giornalìstica.
Sa Fnsi at naradu chi est pretzisu a definire normas craras pro su chi pertocat s’impreu de s’Intelligèntzia Artifitziale in su setore de s’informatzione. Sa punna est de evitare chi sa tecnologia siat impreada pro riprodùere o modificare is noas sena controllu, cun s’arriscu de favorèssere s’ispàinu de informatziones farsas o de alterare sa dibata pùblica.
S’Òrdine de is Giornalistas puru at intervènnidu cun un’espostu presentadu dae su presidente Carlo Bartoli a s’Agcom e a su Ministeru de sa Giustìtzia. In su documentu si dimandat de valutare puru sa possibilidade de adotare medidas cautelares, comente unu secuestru amministrativu de su situ, a manera de tutelare su deretu de is tzitadinos a un’informatzione curreta e trasparente.
Segundu s’Òrdine, su situ si presentat comente unu giornale normale, cun una redatzione, setziones temàticas e un’organizatzione chi podet fàghere pensare a una testada professionale. Mancant però is elementos prevìdidos dae sa normativa italiana: no risurtat registrada comente testada, non giughet unu diretore responsàbile iscritu a s’Àlbu de is Giornalistas e non sunt indicados redatores umanos. A s’imbesse ddoe tenet “agentes editoriales de IA”, sena una descritzione chi permitat a su legidore de cumprèndere deretu si is cuntenutos sunt generados dae algoritmos.
Custu casu torrat a pònnere in evidèntzia unu tema semper prus atuale: comente regulare s’impreu de s’Intelligèntzia Artifitziale in su campu de s’informatzione, garantende su deretu de is tzitadinos a retzire noas verificadas, trasparentes e prodùidas cun responsabilidade professionale.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
