B’at una praja in Domus de Maria chi li narant “Sa Colònia”, e pro seguru no est unu riferimentu a sos insediamentos israelianos in Tzisgiordània. Bi nd’at un’àtera chi li narant “Cala del Morto”, e fintzas custa nudda tenet cun sos mortos cajonados onni die dae un’esèrtzitu chi nânt-chi est de “defensa”. E posca bi nd’at galu un’àtera chi li narant “Su Giudeu”. E a cantu paret non b’intrat nudda cun su pòpulu eletu, ca cussos sunt sos tretos de su “prupu giudeu”.
In sa sienda manna de sa limba sarda b’amus sos vocabulàrios de Toninu Rubattu, e in su chi issu at dedicadu a s’itiologia, si chircamus su lemma “polpo”, b’agatamus
purpu biancu, purtzu zudeu N, pruppu giudeu C “varietà di p. bianco, rosso”; puipessa f. S, purpessa f. Lm G “polpessa (Octpus macropus), mollusco alquanto simile al p. dai tentacoli molto lunghi
Bene, in sa praja de Su Giudeu, comente in àteros logos de Sardigna, b’ant postu unu cartellone bilìngue, in ebràicu e in inglesu cun destinatàrios non sos giudeos e nemmancu sos israelianos. «Sos criminales de gherra non sunt sos bene bènnidos a Sardigna e podet èssere persighidos dae sa lege».
Sas reatziones finas a como fiant pagas, forsis ca non b’at cristianu chi diat dèvere protestare contra a chie non cheret inoghe criminales de gherra. Ma sigomente l’ant postu in sa praja de su giudeu…acudie! Antisemitas! Forsis un’antisemita – cun s’ignoràntzia sua giudeofòbica – aiat pòdidu fàghere un’àtera cosa, pònnere unu cartellu cun un’àteru nùmene pro sa praja, tipu “de su prupu” imbetzes “de su giudeu”.
No, inoghe si faeddaiat petzi de criminales de gherra chi, cun sos bolos dae Tel Aviv, diant pòdere bènnere a s’infundere su paneri in sas abbas marinas de Sardigna, de “su giudeu” o de aterue.
Sa cosa de contare in intro de totu custu est chi amus preferidu a nche lassare a banda su criu de sa chistione (su genotzìdiu, sa pulitzia ètnica, sa conchista de territòrios angenos) pròpiu cando finas su prèmier israelianau Netanyhau at faeddadu a craru de su bisu de sa Grandu Israele.
Si sa de nche pònnere (finas) in cue cussu cartellone fiat una provocatzione pro nde fàghere essire a campu su mudìmene de paritzos pro su chi sunt faghende in Palestina, sa provocatzione diat pàrrere resèssida.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
