Est essidu “Il sogno dei pastori”, longumetràgiu ambientadu in una Sardigna cuntemporànea chi indagat sos disafios de su setore agropastorale, ponende a notu sa crisi funguda sua. Sos pastores, dannificados dae sos prètzios bassos de su late e dae s’epidèmia de sa limba bleu, chircant a sa disisperada sa manera pro parare fronte a sas dificultades issoro.
Sa pellìcula est unu film modernu e poèticu chi si movet intre contu e cummèdia, imberghende su pùblicu in paisàgios sardos ispantosos chi nde leant s’alenu. Sa prima essida natzionale de su film est istada projetada in manera simultànea su 10 de santugaine in Casteddu e in Roma in su Cinema The Screen, cun sa presèntzia de su regista Tomaso Mannoni, de s’atore protagonista Alessandro Gazale e de sos produtores Luca Cabriolu e Andrea Di Blasio. Su film at a abarrare in programmatzione in Casteddu e posca at a èssere distribuidu in àteras salas regionales e italianas.
Tomaso Mannoni, cun una carriera de giudu comente documentarista e una nominatzione a sos Nastri di Argento pro “The Wash”, s’est incraradu in su mundu de sa fiction cun custa pellìcula. “Su bisu de sos pastores” est prodùidu dae Ombre Rosse e Blue Film, cun su sustennu de Rai Cinema e Sardegna Film Commission, e at retzidu su contributu de su Ministèriu de sa Cultura. In antis de arribbare a sas salas, su longumetràgiu at fatu s’esòrdiu suo in su Riff – Rome Independent Film Festival e est istadu seletzionadu pro eventos importantes comente “La valigia dell’attore” e su fèstival de Richmond.
In su film, sa vida de su sartu s’ammescrat a sas dificultades atuales de su cumpartu agropastorale. Sos pastores, intre isperu e acunortu, depent parare barra a una realidade semper prus matanosa. Totu cussos precuntzetos e istereòtipos acapiados a su mundu de sos pastores, Mannoni los contat e los analizat cun mirada irònica e befiana. Sos protagonistas sun Ignazio, interpretadu dae Alessandro Gazale, unu pastore disincantadu, e Andrea, unu turista abbistu interpretadu dae Fabio Fulco. A mediate intre sos duos b’at Antonietta, unu pessonàgiu pragmàtica interpretada dae Astrid Meloni.
“Il sogno dei pastori” resumet duos sèculos de lutas, ponende a craru sa cuntierra contina cun sa burocratzia e sa polìtica, paris cun sa delusione de sos pastores pro su late fuliadu. Mancari gasi, sa narratzione no est documentarìstica, ma prus orientada bia sa cummèdia, cun un’umorismu chi caraterizat sas situatziones e impreende sa tècnica de s’imbrollu pro risòlvere problemas chi parent impossìbiles a isboligare. Cun sas mùsicas evocativas de Mauro Palmas e sa fotografia incantadora de Matteo De Angelis, su film resesset a atzapare s’essèntzia de sa Sardigna, oferende un’esperièntzia emotiva prena de significu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
