In tempos de dudas e oriolos de una parte manna de sa populatzione traballadora chi no ischit nen cando e nen comente l’ant a giubilare, su tema de sas pensiones torrat a prenare sas pàginas de s’informatzione isulana. In Sardigna sos rèdditos de chie si lu diat dèvere gosare custu pasu sunt difatis de sos prus bassos de s’istadu italianu. Non b’at de s’ispantare pro custa àtera conchista a s’imbesse in sas classìficas de su benistare, ma cheret chi nde sighemus a chistionare ca s’assuefatzione a custas novas non est un’agiudu.
Colende·nche a sos datos bidimus chi sa mèdia sarda de sos rèdditos de pensione est de 867 èuros cando chi sa mèdia italiana nche lompet a 1.020. Datos chi pesant mese cun mese finas a unu bilantzu annuale in cuntrastu mannu cun totu su restu chi aumentat. S’istùdiu nou l’at fatu sa Uil sarda tirende un’istantànea chi paret prus unu dagherròtipu chi no una fotografia filtrada. In Sardigna su 63% e barda tenet assignos mensiles chi a milli non b’arrivant. Sas zonas cun sas fertas prus mannas sunt sas de su Sulcis e de su nugoresu in ue s’assignu mìnimu est sa norma.
Pro sa Uil su problema est ligadu fintzas a s’insularidade. Su sindacadu est difatis proponende s’introdutzione de unu coefitziente de cumpensatzione chi pighet in cunsideru su costu de sa vida in sas regiones insulares. De custa manera si torrat a faeddare de unu cuntzetu chi fiamus dae meda sena nd’intèndere allega a pustis de sos annos colados in ue b’at àpidu una batalla pro s’introdutzione sua in Costitutzione.
Ma a banda sos profetos otènnidos, sa dimanda est: tocat a intervènnere pro chi sos gastos in Sardigna siant prus bassos o cherimus eternare e legitimare custa cunditzione pro more de curretivos a su restu? Su de chèrrere s’unu e s’àteru diat pàrrere pròpiu su mìnimu sindacale. Est sa Uil matessi a faeddare de «riforma istruturale», ma pro bi lòmpere cherent bortuladas totu sas polìticas de sos annos colados e cheret chi su sindacadu organizet sa batalla generale de sos traballadores.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
