Custas sunt dies de essidas: su tempus bonu atonginu agiudat e sos eventos peri sas cortes sonant che a una notìfica in sos dispositivos nostros. S’ocasione pro fàghere tapa in sas biddas de Sardigna, duncas, non mancat. Ma no est forsis in custas iscutas coladas cun gosu chi nos abbigiamus de su disacatu antròpicu, urbanìsticu e architetònicu. De su disacatu abitativu, pro la sintetizare.
Posca bi nd’at un’àteru chi però pertocat petzi sas biddas interessadas dae su turismu, cun sos allogos curtzos pro sos vacantzieris e cun su diritu negadu a unu nùmeru mannu de traballadores chi no agatant domo in afitu o chi l’agatant a prejos non cunformes a sas butzacas issoro.
Su problema de sas domos bòidas l’at postu in sa mesa fintzas su segretàriu generale de Anci Sardegna Umberto Oppus, sìndigu de Mandas, chi sas dies coladas nche fiat in assemblea natzionale de s’assòtziu de sos comunes italianos. «Sas biddas minores nde sunt prenas: cun pagos contributos diant pòdere èssere totu cantas a disponimentu e non bi diat dèvere àere problema de domo».
A bisu suo bi diat chèrrere «un’Agenda sarda pro sos comunes piticos, su territòriu e sas àreas rurales e montanas». «Su 1960 – agiunghet Oppus – sa Sardigna cun unu millione 600mìgia abitantes aiat sa populatzione partzida in maniera omogènea in su territòriu. Oe, cun su matessi nùmeru de abitantes amus isboidadu sas zonas de intro pro afortire sos polos urbanos de Casteddu e de s’intòrriu, de Terranoa e Alzachena, de Tàtari e S’Alighera».
Duncas est lòmpidu «su tempus de sos sèberos». Ma custos sèberos non podent èssere ligados petzi a sos contributos. O mègius, sos contributos non podent èssere ligados petzi a s’edilitzia. Diat tocare a investire de prus in su trasportu pùblicu, in sa digitalizatzione, in sa rete iscolàstica e sanitària. E fintzas in unu modellu de turismu diferente dae su càrrigu antròpicu istiale e balneare.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
