Pubblicadu a manera ufitziale su bandu pro sa de XVIII editziones de su Prèmiu de poesia in limba sarda “Benvenuto Lobina”.
Su cuncursu, promòvidu dae s’amministratzione comunale de Biddanoa ‘e Tulu, est abertu a totu sos poetas, fintzas a sos chi istant foras de s’Ìsula, e previdet sa possibilidade de partetzipare cun cumponimentos inèditos e iscritos de cale si siat variante de su sardu, bastit chi non siant mai istados premiados in àteros cuncursos. Sas poesias no ant a dèvere èssere prus mannas de baranta versos e ant a pòdere èssere siat in rima o siat in versos lìberos.
S’initziativa si partzit in duas setziones: sa prima, dedicada a sa poesia a tema de amore, e sa segunda, aberta cada argumentu. Ogna partetzipante at a pòdere cuncùrrere a ambas sas categorias, ma at a pòdere retzire unu primu prèmiu ebbia. A valutare sos traballos at a èssere una cummissione de espertos cumposta dae su presidente Salvatore Tola, dae sa vitze Anna Cristina Serra e dae sos giurados Franca Marcialis, Paolo Boi e Sandro Ghiani. Sa giuria at a assignare unu primu, unu segundu e unu tertzu prèmiu pro cada setzione, cun sa possibilidade de atribuire mentovos de onore o ispetziales pro sos traballos cunsiderados dignos de remonu.
Sos elaborados est a ddos imbiare intro su 22 de abrile 2025.
Inbiende sa posta ordinària tocat a firmare su testu cun unu pseudònimu e aunire, in una busta a banda e firmada, unu fògiu cun sos datos personales: nùmene, sambenadu, indiritzu, nùmeru de telèfonu, indiritzu de curreu eletrònicu e pseudònimu. Sa lìtera est a dd’ispedire a s’indiritzu: Premio di poesia sarda “Benvenuto Lobina”, Comune di Villanova Tulo, Via Cagliari 34, 09066 Villanova Tulo (SU). S’òpera faghet a dda mandare fintzas cun curreu eletrònicu, iscriende in s’ogetu sa setzione de riferimentu e alligongende su testu in formadu PDF no editàbile e firmadu cun unu pseudònimu. In unu segundu documentu tocat a inditados sos datos personales e su pseudònimu impreadu. S’indiritzu de posta eletrònica dedicada est premio.benvenutolobina@gmail.com.
Sa tzerimònia de premiatzione est prevìdida pro sàbadu 7 de làmpadas 2025 in Biddanoa ‘e Tulu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
