Biddanoa Monteleone s’abontat pro unu fine chida intregadu a sa naturalesa e a sa gastronomia locale, cun un’eventu chi tzèlebrat sas erbas ispontàneas de sa Sardigna. Dae su 20 a su 21 abrile, sa manifestatzione “Chenamos in carrela” at a prevìdere unos canto addòbios de non pèrdere, intre laboratòrios e degustatziones, pro promòvere sos primores agroalimentares de sa traditzione biddanoesa.
Organizada dae sa Pro Loco de Biddanoa Monteleone, s’editzione 2024 de “Chenamos in carrela” cumbidat totus cussos chi disìgiant connòschere sas meravìllias naturales de sa Sardigna, dae sas erbas de mandigare a sas impreadas in sa farmacopea populare. In su Tzentru Educatzione Ambientale e Sustenibilidade Monte Minerva, sos partetzipantes ant a tènnere s’oportunidade de sighire is laboratòrios contivigiados dae espertos de su setore, icomente Giampaolo Demartis e su coghineri Fabio Zago, suta de sa ghia esperta de s’enogastrònomu Tommaso Sussarello.
Su programma previdet maicantas faianas. Sàbadu 20 de abrile, a sas 15, s’at a fàghere un’addòbiu introdutivu acanta su CEAS Monte Minerva, sighidu dae bìsitas ghiadas a s’indonu a sas domus de janas, a su Rosedu e a su Giardinu de sas bio-diversidades. A sas 17, in sa Locanda Minerva, Gianpaolo Demartis at a ghiare unu laboratòriu in contu de reconnoschimentu de sas erbas e de sa farmacopea sarda. Sa die s’at a concruire cun unu cùmbidu organizadu dae sa Pro Loco de Biddanoa.
Domìniga 21 de abrile, s’incumentzat a sas 10 acanta sa Locanda Monte Minerva, cun unu laboratòriu chi proponet un’escursione in su sartu a inghìriu de sa bidda cun sa regorta de sas erbas de mandigare. In su matessi momentu, su CEAS at a organizare bìsitas ghiadas a sas domus de janas, a su Rosedu e a su Giardinu de sas biodiversidades. A mesu die, Tommaso Sussarello at a chistionare cun Fabio Zago de comente si podent impreare sas erbas naturales in coghina, sighidu dae un’esibitzione culinària de su coghineri etotu. In fines, a sas 13, semper in sa Locanda, at a èssere serbidu unu pràngiu a tema a base de erbas agrestes (cun billete agiuntivu).
S’eventu est rèndidu possìbile gràtzias a sa collaboratzione cun su Comunu de Biddanoa Monteleone, s’Agèntzia Regionale Forestas, s’assòtziu Sardinia Nature e sa Locanda Minerva, in s’àmbitu de su progetu “Chenamos in carrela”. Totu sas fainas faghent parte de su programma Salude&Trigu de sa Càmera de Cummèrtziu de Tàtari.
Pro partetzipare a sas bìsitas ghiadas, a sos laboratòrios (a su costu de 10 €) e a su pràngiu in Monte Minerva, est a prenotare mutende sa su nùmeru 328 432 6017.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
