In Sardigna sa crèschida de sos prejos nche bàrigat sa mèdia natzionale, mescamente in contu de trasportos, alimentares e utèntzias domèsticos. S’artis artis est de Adiconsum Sardigna, chi evidèntziat sos efetos graes de sa crisi geopolìtica in Mèdiu Oriente.
«In Itàlia – narat su presidente Giorgio Vàrgiu – su tassu mèdiu de inflatzione in abrile fiat a su +2,7%, ma si s’analizant sos datos Istat relativos a sa Sardigna bidimus chi in s’ìsula sos prejos tenent unu ritmu prus lestru. S’inflatzione de abrile, difatis, marcat unu +2,9% in Tàtari e unu +3,1% in Terranoa-Tèmpiu. Si sarvat petzi Casteddu, cun unu tassu de su +2,6%, pru lèbiu de pagu cunforma a sa mèdia natzionale».
Su picu màssimu si registrat in su setore de sos benes alimentares, ue sos incrementos in s’ìsula resurtant prus chi non graes.
«Ma sa cosa chi dat prus pensamentu – annanghet Vàrgiu – est mescamente s’andamentu de sos listinos de sos produtos alimentares: si in Itàlia sos prejos de màndigos e bèvidas creschent in abrile de su +2,9% s’annu, in Sardigna sa crèschida est de su +3,2% in Casteddu, +3,8% in Tàtari e fintzas de su +4% in Terranoa».
Sos aumentos de su gasòliu si faghent intèndere in sa logìstica sarda, faghende artziare sos costos de sos benes chi viàgiant in s’asfaltu, mescamente sos produtos friscos. S’assòtziu timet fintzas ispeculatziones chi isfrutant su cunflitu in Iran pro impònnere rincaros ingiustificados. Fintzas sos gastos pro energia e pro sos combustìbiles registrant crèschidas manas: +5% in Casteddu, +6,7% in Tàtari e +6,8% in Terranoa-Tèmpiu.
«Sa cunsighèntzia de sa crèschida de s’inflatzione – serrant Vàrgiu – est unu corfu mannu pro sos consumadores: cunforma a sas istimas de Adiconsum Sardigna, pighende in cunsideru s’ispesa annuale pro sos consumos de una famìlia residente, s’agràviu de ispesa prodùidu dae sa gherra in Iràn nche lompet a sos 800 èuros a nùcleu».
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
