Sàbadu coladu, su 14 de làmpadas, su Teatru Santu Franciscu at acasagiadu sa manifestatzione “Ora tocca a noi raccontare”, atopu finale de su progetu “Promemoria Auschwitz 2025”, promòvidu dae su Plus Ogliastra (Comunu de Tortolì capufilera), paris cun Arci Sardegna e Deina Aps.
Unu percursu cumintzadu su 29 de ghennàrgiu cun sa partetzipatzione de unos baranta istudiantes de s’Ogiastra e de sa Sardigna, acabbadu cun sa bìsita a is logos sìmbulu de sa Shoah: is campos de istermìniu de Auschwitz‑Birkenau, in su de 80 anniversàrios de sa liberatzione issoro. Sàbadu, is giòvanos ant torradu a sa comunidade s’esperièntzia issoro, esponende in forma teatrale is sentidos e is riflessiones maduradas durante su biàgiu.
Intre is autoridades fiant presentes: su sìndigu de Tortolì, Marcello Ladu, sa cummissària de sa Provìntzia de Ogiastra, Marzia Mameli, e is sìndigos de Cardedu e Triei, Marcello Vacca e Anna Assunta Chironi, cun s’assessora a is Servìtzios Sotziales de su comunu de Tortolì Irene Murru.
A traessu de un’intrèveru de recitatzione e diàlogu cun sa platea, is pitzocos ant tocadu fintzas unu tema atuale meda: ant tratzadu parallelismos intre is campos nazistas e is graves violatziones de is deretos umanos in sa Fràngia de Gaza, torrende a cramare s’atentzione subra sa responsabilidade de sa memòria in su de prevènnere abusos noos.
Su cunfrontu est istadu intensu e ricu de significadu. Paris cun su biàgiu a Cracòvia, su programa at prevìdidu laboratòrios subra fascismu, totalitarismos, persecutziones, Segunda Gherra Mundiale e genotzìdiu. Is partetzipantes ant bisitadu is campos de cuntzentramentu, su bighinadu ebràicu e s’ex ghetu, su Museu “Fràbica de Schindler”.
S’esperièntzia, pensada pro segugiare ispìritu crìticu e tzitadinàntzia ativa in su presente, at furriadu sa memòria a motore de trasformatzione sotziale. Su progetu lassat unu signale forte: sa memòria no est petzi regordu de su passadu, ma fintzas impinnu essentziale pro su benidore.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
